అమెరికా అంతరిక్ష పరిశోధనా సంస్థ (నాసా) సూర్యూడిని ఓ గంట పాటు వీడియో షూట్ చేసింది. దీంతో నాసా నెటిజన్ల ప్రశంసలు అందుకుంది. నాసాకి చెందిన సోలార్ డైనమిక్స్ అబ్జర్వేటరీ (ఎస్డీఓ) దశాబ్ద కాలానికి పైగా సూర్యుణ్ని చూస్తోంది. ఇది పదేళ్లలో 42.5 కోట్ల హై రిజల్యూషన్ ఫొటోలు తీసింది. ఈ ఫోటలన్నింటినీ చేర్చి నాసా టైమ్ లాప్స్ వీడియోగా కుదించింది.
పదేళ్ల మొత్తం ఫుటేజ్ ఒక గంటకు కుదించింది. ఆ అరుదైన టైమ్ లాప్స్ వీడియోని యూట్యూబ్‌లో ఉంచింది. దశాబ్దకాలపు సూర్యుడు అనే టైటిల్ పెట్టింది. ఈ వీడియోపై నెటిజన్లు ప్రశంసలు కురిపిస్తున్నారు. పది సంవత్సరాల పాటు ప్రతిరోజూ ఒక గంట పాటు సూర్యుడిని రికార్డ్ చేసింది.
ఇకపోతే నాసా విడుదల చేసిన ఈ వీడియోలో సూర్యుడిపై భారీ మంటలు, సూర్యకంపాలు, సౌరగాలులు ఇలా ఎన్నో కనిపిస్తున్నాయి. ఇందులో సూర్యగ్రహణాలు కూడా ఉన్నాయి. జూన్ 24న అప్‌లోడ్ చేసిన ఈ వీడియో ఇప్పుడో సెన్సేషన్‌గా మారింది. ఇప్పటికే ఈ వీడియోను ఆరున్నర లక్షల మంది వీక్షించగా, 7.5వేలకు పైగా లైక్స్ వచ్చాయి. ఈ వీడియోను మీరూ ఓ లుక్కేయండి.