అమెరికాలో జరిగిన జార్జి ఫ్లాయిడ్ అనే నల్లజాతీయుడు గత యేడాది దారుణ హత్యకు గురయ్యాడు. ఈయన మెడను ఓ పోలీస్ అధికారి కాలితో నొక్కిపట్టి ఊపిరి ఆడకుండా చేయడంతో ప్రాణాలు కోల్పోయాడు. ఈ ఘటన ప్రపంచ వ్యాప్తంగా చర్చనీయాంశంగా మారింది.
ఈ క్రమంలో జార్జి ఫ్లాయిడ్ హత్య కేసులో కోర్టు తీర్పు వెలువరించింది. ఈ మరణానికి కారణమైన అమెరికా పోలీసుల అధికారి డెరిక్ చౌవిన్ (45)కు అమెరికా కోర్టు 270 నెలల (ఇరవై రెండున్నర సంవత్సరాలు) జైలు శిక్ష విధించింది. డెరిక్‌ను ఇదివరకే దోషిగా నిర్ధారించిన కోర్టు గత రాత్రి అతడికి శిక్షను ఖరారు చేస్తూ తీర్పును వెలువరించింది.
గతేడాది మే 25న జార్జి ఫ్లాయిడ్ మెడను నడిరోడ్డుపై డెరిక్ చౌవిన్ మోకాలితో నొక్కి అదిమిపట్టాడు. తనకు ఊపిరి ఆడడం లేదని, కాలు తీయాలని ఫ్లాయిడ్ వేడుకున్నా డెరిక్ కనికరించలేదు. ఆ తర్వాత ఫ్లాయిడ్‌ను ఆసుపత్రికి తరలించగా మరణించాడు. ఇందుకు సంబంధించి వీడియోలు, పొటోలు అప్పట్లో ప్రపంచవ్యాప్తంగా వైరల్ అయ్యాయి.