పాక్‌తో పాటు 12 దేశాలపై విజిటింగ్ వీసాలను రద్దు

కరోనా వైరస్ విజృంభిస్తున్న తరుణంలో అరబ్ దేశం కొత్త నిర్ణయం తీసుకుంది. పలు దేశాల పౌరులకు జారీ చేసిన విజిటింగ్ వీసాలను రద్దు చేస్తున్నట్టు యునైటెడ్ అరబ్ ఎమిరేట్స్ స్పష్టం చేసింది. కొత్త వీసాల జారీని సైతం నిలిపివేయనున్నామని అధికారులు స్పష్టం చేశారు. 

పాకిస్థాన్ సహా మొత్తం 12 దేశాల ప్రజలపై ఈ తాత్కాలిక నిషేధం అమలవుతుందని విదేశాంగ శాఖ ప్రతినిధి జాహిద్ హఫీజ్ చౌధురి వెల్లడించారు. సోమాలియా, లిబియా, కెన్యా, ఆఫ్గనిస్థాన్, టర్కీ, ఇరాన్, యమన్, సిరియా, ఇరాక్ దేశాల వాసులకు జారీ చేసిన వీసాలపైనా నిషేధం అమలులో ఉంటుందని ఆయన స్పష్టం చేశారు.

గడిచిన వారం రోజులుగా పాకిస్థాన్‌లో రోజుకు 2 వేలకు పైగా కొత్త కరోనా కేసులు నమోదవుతున్న సంగతి తెలిసిందే. మిగిలిన దేశాల్లోనూ ఇదే తరహా పరిస్థితి నెలకొంది. కాగా, యూఏఈ నుంచి పాకిస్థాన్‌కు గత జూన్ నుంచి ఎమిరేట్స్ విమాన సర్వీసులు రద్దయిన సంగతి తెలిసిందే. తాజాగా 12 దేశాలపై విజిటింగ్ వీసాలను తాత్కాలికంగా రద్దు చేస్తున్నట్లు అరబ్ అధికారులు తేల్చి చెప్పారు.