నేపాల్‌లో ఓ అరుదైన తాబేలు కనిపించింది. ఈ తాబేలు కవచం బంగారు వర్ణంతో ఉంది. అంటే.. ఆ తాబేలు బంగారు కవచంతో పుట్టింది. దీంతో ప్రతి ఒక్కరూ దీన్ని దేవుని అవతారంగా భావించి, పూజిస్తున్నారు. ఈ దృశ్యం నేపాల్ దేశంలో కనిపించింది.
తాజాగా వెలుగులోకి వచ్చిన ఈ వివరాలను పరిశీలిస్తే, నేపాల్ దేశంలోని ధ‌నుషా జిల్లాలో భాగమైన ధనుషాధమ్ మున్సిపాలిటీలో ఓ తాబేలు బంగారు కవచంతో ఉండటాన్ని స్థానికులు గుర్తించారు. దీంతో ఇది దేవుడి అవతారంగా భావించి పూజలు చేయడం ప్రారంభించారు.
మరోవైపు, మిథిలా వైల్డ్‌లైప్ ట్రస్ట్ మాత్రం దీన్ని భారతీయ ఫ్లాప్ షెల్ తాబేలుగా గుర్తించింది. కానీ, క‌మ‌ల్ దేవ్‌కోట అనే స‌రీసృపాల నిపుణుడు ఈ తాబేలుకు అధ్యాత్మిక ప్రాముఖ్య‌త ఉంద‌ని చెప్పుకొచ్చారు. దీనిమీద డాక్యుమెంట్ కూడా చేశారు.
నేపాల్‌లో తాబేళ్ల‌కు మ‌త, సాంస్కృతిక విలువ‌లున్నాయ‌ని చెప్పారు. విశ్వాన్ని విధ్వంసం నుంచి కాపాడటానికి విష్ణువు తాబేలు రూపాన్ని తీసుకున్నాడని చాలామంది నమ్ముతున్నారంటున్నారు. తాబేలుగా ఉన్న‌ప్పుడు విష్ణువుని భారతీయ పురాణాల‌లో కుర్మావతారంగా అని పిలుస్తారు.
ఈ జీవిని నేపాల్‌లోనే కాదు భార‌త‌దేశం అంత‌టా దేవాల‌యాల్లో పూజిస్తారు. తాబేలు పైనున్న షెల్‌ను ఆకాశాన్ని, కిందున్న షెల్‌ను భూమిని సూచిస్తుంద‌ని దేవ్‌కోట అంటున్నారు. నిపుణులు అభిప్రాయం ప్ర‌కారం క్రోమాటిక్ లూసిజం వ‌ల్ల తాబేలుకు మెరిసే షెల్ వ‌చ్చిందంటున్నారు.
ఈ లూసిజం తెలుపు, లేత, పాచీ రంగులో ఉంటుంది. మ‌రోమాట‌లో చెప్పాలంటే ఇది జంతువుల‌లో రంగు వ‌ర్ణ‌ద్ర‌వ్యం కోల్పోతుంది. అయితే, ఈ తాబేలు విషయంలో లూసిజం గ్జాంతోఫోర్స్‌ ఆధిపత్యానికి దారితీసింది. ప్ర‌పంచ‌వ్యాప్తంగా ఉన్న జాతుల‌లో ఈ తాబేలు ఐదవది. ఇది నేపాల్‌లోనే మొద‌టి రికార్డు. ఈ తాబేలు జన్యుపరివర్తన కారణంగా అలా జన్మించివుంటుందని చెబుతున్నారు.