భార్యకు నచ్చలేదని రూ.27 లక్షల కారును చెత్త కుప్పలో పడేసిన భర్త!

తాను ఎంతో ఇష్టపడి రూ.27 లక్షలు వెచ్చించి అందమైన కారును ఓ వ్యక్తి కొనుగోలు చేశాడు. అయితే, ఆ కారు ఆయన భార్యకు నచ్చలేదు. అంతే.. మరోక్షణం ఆలోచన చేయకుండా ఆ కారును చెత్తకుప్పలో పడేశాడు. ప్రస్తుతం ఆ ప్రాంతం ఓ పర్యాటక ప్రాంతంగా మారింది. అసలేం జరిగిందో తెలుసుకుందాం.

రష్యా రాజధాని మాస్కో నగర సమీపంలోని మైటిష్బ్‌ అనే ప్రాంతానికి చెందిన ఓ వ్యక్తి తమ తమ వైవాహి బంధంలో అపుడపుడూ తలెత్తే చిన్నపాటి తాగాదాలను పరిష్కరించుకోవాలని నిర్ణయించుకున్నాడు. అందులోభాగంగా, ప్రేమికుల రోజున తన భార్యకు ఖరీదైన ఎస్‌యూవీ కారు ధర సుమారు రూ.27 లక్షలు వెచ్చించి కారును కొనుగోలు చేశాడు. 

అయితే, ఆ కారును కొనుగోలుకు ముందే కొన్ని ప్రాంతాల్లో డ్యామేజీ అయింది. దీంతో  ఆ కారును భార్య తిరస్కరించింది. దీంతో చిర్రెత్తుకొచ్చిన ఆ భర్త చెత్త కంటైనర్‌లో ఆ కారును పడేశాడు. ఇది అక్కడి స్థానికులను ఆశ్చర్యానికి గురిచేసింది. దాదాపు రెండు వారాలుగా ఆ కారు అక్కడే ఉండిపోయింది. 

ఇదిలావుంటే, చెత్త కంటైనర్‌పై ఉన్న కారుతో ఫోటోలు దిగేందుకు స్థానికులతో పాటు పర్యాటకులు సైతం ఆసక్తి చూపుతున్నారు. దీంతో ఆ ప్రాంతం ఇపుడు టూరిస్ట్ స్పాట్‌గా మారిపోయింది. అయితే, దాన్ని ఆ కారును అక్కడ నుంచి తొలగించేందుకు అధికారులు సైతం ప్రయత్నించకపోవడం గమనార్హం.