ప్రస్తుతం దేశాంతర, ఖండాంతర వివాహాలు కొత్తేమి కాదు. తాజాగా రెండు శత్రు దేశాలకు చెందిన యువతీయువకులకు పెళ్లి జరిగింది. పాకిస్థాన్‌కు చెందిన ఓ యువతి తన ప్రాణాలకు తెగించి దేశ సరిహద్దులను దాటుకుని భారత్లోకి అడుగుపెట్టింది. ఇక్కడ తన ప్రియుడిని వివాహం చేసుకుంది. ఈ విషయం బయటకు పొక్కడంతో భద్రతా బలగాలు ఆ యువతిని అదుపులోకి తీసుకుని మళ్లీ పాకిస్థాన్ సరిహద్దు భద్రతా బలగాలకు అప్పగించారు. ఈ వివరాలను పరిశీలిస్తే,
ఇఖ్రా జీవానీ అనే ఓ పాకిస్థాన్‌కు చెందిన 19 యేళ్ల యువతి ఆన్‌లైన్‌లో లూడో గేమ్ ఆడుతూ ఉత్తరప్రదేశ్ రాష్ట్రానికి చెందిన ములాయం సింగ్ అనే 26 యేళ్ల యువకుడితో పరిచయమైంది. ఆ తర్వాత వీరిద్దరూ ప్రేమలో పడ్డారు. అతన్ని వివాహం చేసుకునేందుకు ఆ యువతి సరిహద్దులను దాటి వచ్చింది. ఇందుకోసం ఆమె ఎన్నో కష్టాలుపడింది.
ముందుగా పాకిస్థాన్ నుంచి నేపాల్‌కు చేరుకుంది. నేపాల్ రాజధాని ఖాట్మండుకు తన ప్రియుడిని రప్పించి అతన్ని కలుసుకుంది. మనసు విప్పి మాట్లాడింది. వారిద్దరూ అక్కడే పెళ్లి చేసుుకున్నారు. ఆ తర్వాత సరిహద్దు ప్రాంతమైన సనోలీ ప్రాంతం మీదుగా భారత్లోకి అడుగుపెట్టారు.
ములాయం కొన్నేళ్లుగా బెంగుళూరులో ఉంటున్నాడు. దీంతో ఇఖ్రా కూడా భర్తతో వెళ్లి అక్కడే కాపురం పెట్టాలని నిర్ణయించుకున్నారు. పైగా, ఇఖ్రా తన పేరును హిందూ పేరును తలపించేలా రవా అని మార్చుకుంది. అయితే, ఆమె నమాజ్ చేస్తుండటంతో ఇరుగపొరుగువారు గమనించి పోలీసులకు సమాచారం ఇచ్చారు.
దీంతో ఇఖ్రాను అదుపులోకి తీసుకున్న పోలీసులు.. ఆమె వద్ద లోతుగా విచారణ జరిపారు. ఈ విచారణంలో అసలు నిజం చెప్పారు. దీంతో ఆ యువతిని పంజాబ్ రాష్ట్రంలోని అమృతసర్‌కు తరలించారు. అక్కడ నుంచి అట్టారీ బోర్డర్ నుంచి పాకిస్థాన్‌కు తిప్పిపంపించారు.