ముస్సోరిలో 22 ఏళ్ల యువకుడి ఆత్మహత్య సంచలనమైంది. ముస్సోరిలోని లాల్ బహదూర్‌శాస్త్రి నేషనల్ అకాడమీ ఆఫ్ అడ్మినిస్ట్రేషన్‌లో పనిచేసే 22 ఏళ్ల యువకుడు చీర ధరించి, బొట్టు పెట్టుకుని, లిప్‌స్టిప్ పెట్టుకుని ఆత్మహత్య చేసుకున్నాడు. మృతుడిని ఉత్తరాఖండ్‌లోని గర్వాల్‌కు చెందిన అనుకూల్ రావత్‌గా గుర్తించారు.
అకాడమీలో రావత్ ఇటీవలే మల్టీ టాస్కింగ్ స్టాఫర్‌గా చేరాడు. అయితే విధులకు సరిగ్గా హాజరయ్యే వాడు కాదు. తాజాగా, మరోమారు విధులకు డుమ్మా కొట్టడంతో అతడి కోసం రూముకు వెళ్లిన సహచరులు తలుపు తట్టారు. ఎన్నిసార్లు కొట్టినా లోపలి నుంచి సమాధానం రాకపోవడంతో అనుమానం వచ్చి కిటికీ లోంచి చూడగా ఉరివేసుకుని కనిపించాడు.
రావత్ బహుశా మానసిక సమస్యలతో బాధపడుతూ ఉండొచ్చని పోలీసులు ప్రాథమికంగా నిర్ధారించారు. అతడి వద్ద ఎలాంటి సూసైడ్ నోట్ లభించలేదని పోలీసులు తెలిపారు. అతడి కుటుంబ సభ్యులకు సమాచారం అందించారు.