ఒంటరిగా జాగింగ్‌కు వచ్చిన ఓ మహిళపై ఓ వృద్ధుడు లైంగిక దాడికి పాల్పడ్డాడు. తన వ్యానులో నీలి చిత్రాలు చూస్తూ కూర్చొన్న భారత సంతతికి చెందిన 60 యేళ్ళ వృద్ధుడు రెచ్చిపోయి లైంగికదాడికి పాల్పడ్డారు. ఈ ఘటన సింగపూర్‌లో జరిగింది.
తాజాగా వెలుగులోకి వచ్చిన ఈ వివరాలను పరిశీలిస్తే, సింగపూర్‌లో ఫుడ్ డెలివరీ డ్రైవర్‌గా విధులు నిర్వహిస్తున్న 60 ఏండ్ల కన్నన్‌ సుకుమారన్‌ ఈ ఏడాది మే 12 రాత్రి 7.30 గంటల సమయంలో వ్యాన్ లోపల నీలి చిత్రాలు చూస్తూ కూర్చున్నాడు.
ఇదేసమయంలో ఓ 36 యేళ్ళ మహిళ అటువైపు జాగింగ్‌ రావడంతో ఆమెను చూసి సుకుమారన్‌ మరింత రెచ్చిపోయాడు. వెంటనే వ్యాన్ దిగి ఆమెను చెట్ల పొదల్లోకి లాక్కెళ్లి లైంగిక దాడికి యత్నించాడు.
ఆ మహిళ ప్రతిఘటించడంతో సుకుమారన్‌ ఆమెను ఛాతీ మీదుగా కొట్టాడు. దీంతో ఆమె కింద పడిపోయి సుకుమారన్‌ చేతిని గట్టిగా కొరికి సాయం కోసం కేకలు పెట్టింది. బాధితురాలి అరుపులు విని ఘటనా స్థలానికి మరో మహిళ రావడంతో సుకుమారన్‌ వ్యాన్ వద్దకు పరిగెత్తుకుంటూ వెళ్లిపోయాడు.
వచ్చిన మహిళ సుకుమారన్‌ వ్యాన్ నెంబర్‌ను నోట్‌ చేసుకొని పోలీసులకు ఫిర్యాదు చేసింది. తర్వాత పోలీసులు అతడిని అరెస్టు చేసి కోర్టులో హాజరు పర్చగా పలు వాయిదాల అనంతరం మంగళవారం సింగపూర్‌ న్యాయ శాఖ అతడికి నాలుగేళ్ళ మూడు నెలల పాటు జైలు శిక్ష విధించింది.