చైనా ప్రభుత్వం కీలక నిర్ణయం తీసుకుంది. కుప్పలు తెప్పలుగా ఉన్న అశ్లీల వెబ్సైట్లను మూసివేసింది. అంతర్జాల సేవలను నియంత్రించే చైనా.. గతేడాది దాదాపు 18,489 వెబ్సైట్లను మూసేసింది. మరో 4,551 వెబ్సైట్లకు హెచ్చరికలు జారీ చేసింది.
ఆన్లైన్ విద్య పేరిట గేమ్స్ను ప్రోత్సహిస్తూ, డేటింగ్ మోసాలకు పాల్పడుతున్న కొన్ని వెబ్సైట్లను గుర్తించినట్టు 'చైనా సైబర్ స్పేస్ విభాగం'(సీఏసీ) వెల్లడించింది. వీటితో పాటు అశ్లీల చిత్రాల వ్యాప్తి, హింసను ప్రేరేపించడం, అక్రమ వస్తు రవాణాకు పాల్పడుతున్న వారిని గుర్తించి శిక్షించినట్టు తెలిపింది.
చట్టవిరుద్ధ కార్యకలాపాలను ప్రోత్సహించే ఆన్లైన్ వేదికలను ప్రక్షాళన చేసేందుకు సీఏసీ చర్యలు చేపట్టిందని ప్రభుత్వ వార్తా సంస్థ జిన్హువా వెల్లడించింది. అయితే ప్రభుత్వానికి వ్యతిరేకంగా ఉన్న వెబ్సైట్లను చైనా అణచివేస్తోందని విమర్శకులు ఆరోపిస్తున్నారు.