హాట్ ఎయిర్ బెలూన్‌లో మంటలు - 8 మంది మృత్యువాత

బ్రెజిల్ దేశంలో ఘోర ప్రమాదం చోటుచేసుకుంది. పర్యాటకులతో ప్రయాణిస్తున్న హాట్ ఎయిర్ బెలూన్ గాలిలో ఉండగానే మంటల్లో చిక్కుకుని కూలిపోయింది. ఈ ప్రమాదంలో ఎనిమిది మంది పర్యాటకులు ప్రాణాలు కోల్పోగా, మరో 13 మంది గాయపడ్డారు. ఈ విషాదకర ఘటన శనివారం ఉదయం సౌత్ బ్రెజిల్‌లోని శాంటా కాటరినా రాష్ట్రంలో జరిగింది. 

వివరాలను పరిశీలిస్తే, శాంటా కాటరినా రాష్ట్రంలోని ప్రయా గ్రాండే నగరంలో శనివారం తెల్లవారుజామున మొత్తం 21 మంది ప్రయాణికులతో గాల్లోకి ఎగిరిన ఈ పర్యటాక బెలూన్ మార్గమధ్యంలో ఒక్కసారిగా మంటలు చెలరేగాయి. ఈ మంటలు అంటుకున్న కొద్దిసేపటికే బెలూన్ నియంత్రణ కోల్పోయి వేగంగా భూమిపై కూలిపోయింది.

ప్రమాదం జరిగిన వెంటనే స్థానిక అధికారులు, అగ్నిమాపక సిబ్బంది సంఘటనా స్థలానికి చేరుకుని సహాయక చర్యలు చేపట్టారు. ఈ ప్రమాదంలో 8 మంది అక్కడికక్కడే మృతి చెందినట్టు నిర్ధారించారు. గాయపడిన 13 మందిని హుటాహుటిన సమీపంలోని ఆస్పత్రులకు తరలించి చికిత్స అందిస్తున్నట్టు అగ్నిమాపక శాఖ పేర్కొంది. కాగా, ఈ ఘటనపై స్థానిక ప్రభుత్వ అధికారులు తీవ్ర దిగ్భ్రాంతిని వ్యక్తం చేశారు. ప్రమాదానికి ఖచ్చితమైన కారణాలపై దర్యాప్తు జరుపుతున్నారు.