పొట్ట ఎందుకు పెరుగుతుందంటే...

ఇపుడు ప్రతి ఒక్కరికీ పొట్ట రావడం కామణమైపోయింది. అసలు చాలా మందికి పొట్ట పెరగడానికి కారణం తీసుకునే ఆహారంలో అధిక మొత్తంలో క్యాలరీలు కొవ్వు రూపంలో నిల్వ ఉండటం. దీనికి కారణం మారుతున్న ఆహారపు అలవాట్లు. సరైన శారీరక వ్యాయామం లేకపోవడం. వేళాపాళా లేకుండా ఫాస్ట్ ఫుడ్స్ ఆరగించడం వల్ల పొట్ట పెరుగుతుందని ప్రతి ఒక్కరూ భావిస్తుంటారు. 

కానీ, వైద్యులు మాత్రం మరోమారు సెలవిస్తున్నారు. రాత్రి వేళల్లో భోజనం చేసిన వెంటనే నిద్రలోకి జారుకోవడం వల్లే పొట్ట వస్తుందని తేల్చారు. అంతేకాకుండా ఎంత ఆహారం తిన్నామో దానికి తగినట్టుగా శారీరకంగా శ్రమపడాలని సలహా ఇస్తున్నారు. 

ఇందుకోసం వాకింగ్ చేయడం, వ్యాయామాలు చేయడం, యోగా చేయడం, ఆహార నియామాలు పాటించడం వంటివి చేయాలని సూచిస్తున్నారు. అలాగే, చిప్స్, వేపుళ్లు, శీతలపానీయాలకు దూరంగా ఉంచాలంటున్నారు. 

అలాగే, రాత్రుల్లో నిర్ణీత సమయానికే భోజనం చేయాలనీ, రాత్రిపూట త్వరగా జీర్ణమయ్యేలా అల్పాహారం తీసుకోవాలని, బహుళ అంతస్తుల్లో ఉన్నవారు లిఫ్టులను వాడకుండా మెట్ల ఉపయోగిస్తూ దిగుతూ ఎక్కుతూ ఉండాలని సలహా ఇస్తున్నారు. అలాగే, రోజుకు కనీసం ఆరు నుంచి ఎనిమిది గంటల పాటు నిద్రపోవాలని వైద్యులు సలహా ఇస్తున్నారు.