వేసవి కాలం వచ్చింది కదా.. కాస్త చల్లదనంగా కోసం మార్కెట్‌లో లభించే కూల్‌డ్రింక్స్‌ను ఇష్టంగా తాగేస్తున్నారా? అయితే జాగ్రత్త..కాస్త ఆలోచించండి. ఇలా చేయడం వల్ల మనం అనారోగ్యాన్ని కోరి తెచ్చుకున్నవాళ్లం అవుతాం. సాధారణంగా కూల్‌డ్రింక్స్ అనేవి కాలంతో సంబంధం లేకుండా లభిస్తాయి.
మనలో చాలా మంది వాటిని ఎంతో ఇష్టంగా తాగుతుంటారు. ఎండాకాలంలో అయితే దాహం మరీ ఎక్కువగా ఉండడం వల్ల కూల్‌డ్రింక్‌లను తాగుతారు. వీటి వల్ల దాహం తీరుతుంది కానీ ఎన్నో ఆరోగ్య సమస్యలు చుట్టుముడతాయి. ముఖ్యంగా శరీర బరువు అమాంతం పెరిగిపోతుంది.
కూల్‌డ్రింక్స్‌లో కేలరీలు, అలాగే చక్కెర శాతం ఎక్కువగా ఉంటాయి. దీని వల్ల షుగర్, ఊబకాయం, గుండె సంబంధిత సమస్యలు వచ్చే ప్రమాదముంది. బరువు తగ్గాలనుకునే వాళ్లు కూల్‌డ్రింక్స్‌కి దూరంగా ఉండడం చాలా మంచిది. కూల్‌డ్రింక్స్‌లో సోడా శాతం అధికంగా ఉంటుంది. ఫలితంగా తీసుకున్న ఆహారం త్వరగా జీర్ణమై మళ్లీ మళ్లీ ఆకలేస్తుంది. ఎక్కువ ఆహారం తింటారు. దీంతో బరువు పెరిగే అవకాశాలు ఎక్కువగా ఉన్నాయి.
కూల్‌డ్రింక్స్‌లో కలిపే కెమికల్స్ శరీరానికి హాని కలిగిస్తాయి. వీటిని ప్రూవ్ చేయడానికి చాలామంది కూల్‌డ్రింక్స్‌తో ఇంట్లోని సింక్స్ శుభ్రం చేయడం వంటి వీడియోలను యూట్యూబ్‌లో పోస్ట్ చేస్తున్నారు. అంటే వీటిని యాసిడ్‌కి బదులుగా వాడుతున్నారన్న మాట.
ఈ శీతలపానీయాలు చల్లగా ఉంటూనే నోట్లోకి వెళ్లి విషంగా మారి ప్రాణాలను హరిస్తున్నాయని ఇప్పటికైనా గ్రహించండి. కూల్‌డ్రింక్స్ తాగాలనుకున్నప్పుడు వాటికి బదులుగా నీటిని తాగండి లేదా ఫ్రూట్ జ్యూస్ తాగండి. ఇలా చేయడం వల్ల మీకు అనారోగ్యం దూరమై ఆరోగ్యవంతులుగా మారతారు.