భారత మాజీ కెప్టెన్ ఎంఎస్ ధోనీ మాజీ-బిజినెస్ భాగస్వామి మిహిర్ దివాకర్‌ను పోలీసులు అరెస్ట్ చేశారు. దిగ్గజ క్రికెటర్ ధోనీ స్వయంగా దాఖలు చేసిన క్రిమినల్ కేసు తర్వాత మోసం ఆరోపణలపై మంగళవారం దివాకర్‌ను పోలీసులు అరెస్టు చేశారు.
రాంచీ జిల్లా కోర్టులో సౌమ్యదాస్‌తో పాటు దివాకర్‌పై ధోనీ ఫిర్యాదు చేశాడు. ఆర్కా స్పోర్ట్స్ మేనేజ్‌మెంట్ ప్రైవేట్ లిమిటెడ్ డైరెక్టర్‌గా ఉన్న దివాకర్‌ను జైపూర్ పోలీసులు మంగళవారం అదుపులోకి తీసుకున్నారు. క్రికెట్ అకాడమీల స్థాపనకు ధోనీ పేరును అనధికారికంగా వాడుకున్నారనే ఆరోపణలకు ప్రతిస్పందనగా ఈ అరెస్టు జరిగింది.
దివాకర్ భారత మాజీ కెప్టెన్ ధోనీ పేరును ఉపయోగించి భారతదేశం, విదేశాలలో అనేక క్రికెట్ అకాడమీలను ప్రారంభించినట్లు తెలిసింది. ధోని క్రికెట్, స్పోర్ట్స్ అకాడమీల కోసం దివాకర్ డబ్బు తీసుకున్నట్లు కూడా ఆరోపణలు వచ్చాయి. ఇది రూ. 15 కోట్లకు పైగా మోసానికి దారితీసింది. అయితే తనకు తెలియకుండానే క్రికెటర్ల అకాడమీలను భాగస్వాములు ఏర్పాటు చేశారని చెన్నై సూపర్ కింగ్స్ కెప్టెన్ పేర్కొన్నాడు.