ఉప్పల్ స్టేడియాలో భారత్, న్యూజిలాండ్ జట్ల మధ్య తొలి వన్డే మ్యాచ్ జరుగుతోంది. ఈ మ్యాచ్‌లో భారత ఆటగాడు శుభమన్ గిల్ వీరబాదుడు బాదాడు. ఏకంగా డబుల్ సెంచరీ చేశాడు. కేవలం 87 బంతుల్లో సెంచరీ బాదిన గిల్.. ఆతర్వాత మరింత దూకుడుగా ఆడి డబుల్ సెంచరీ పూర్తి చేసుకున్నాడు. 145 బంతుల్లోనే అత‌ను రెండొంద‌లు సాధించాడు. ఫెర్గూస‌న్ బౌలింగ్‌లో వ‌రుస‌గా హ్యాట్రిక్ సిక్స్‌లు బాదాడు. త‌న క‌ళాత్మ‌క షాట్ల‌తో ఉప్పల్ స్టేడియాన్ని హోరెత్తించాడు. అత‌ని ఇన్నింగ్స్‌లో 19 ఫోర్లు 8 సిక్స‌ర్లు ఉన్నాయి. దాంతో భారత్ నిర్ణీత ఓవర్లలో భారీ స్కోర్ చేసింది. ఫలితంగా నిర్ణీత 50 ఓవర్లలో 349 పరుగులు చేసింది.
ఇటీవల శ్రీలంకతో మూడో వన్డేలోనూ గిల్ సెంచరీ బాదడం తెలిసిందే. సూపర్ ఫామ్‌లో ఉన్న గిల్ బుధవారం హైదరాబాద్ ఉప్పల్ స్టేడియంలోనూ పరుగుల వెల్లువ సృష్టించాడు. అంతకుముందు రోహిత్ శర్మ 34, సూర్యకుమార్ యాదవ్ 31, హార్దిక్ పాండ్యా 28 పరుగులు చేశారు. కోహ్లీ (8), ఇషాన్ కిషన్ (5) విఫలమయ్యారు. కివీస్ బౌలర్లలో డారిల్ మిచెల్ 2, లాకీ ఫెర్గుసన్ 1, బ్లెయిర్ టిక్నర్ 1, మిచెల్ శాంట్నర్ ఒక వికెట్ తీశారు.