కరోనా విశ్వరూపం.. హోం ఐసోలేషన్‌కు కొత్త మార్గదర్శకాలను రిలీజ్ చేసిన కేంద్రం

దేశంలో కరోనా వైరస్ ఉగ్రరూపం దాల్చిది. రోజూ నాలుగు లక్షలకు పైగా కేసులు నమోదవుతున్నాయి. ఈ క్రమంలో కేంద్ర ప్రభుత్వం కొత్త మార్గదర్శకాలను విడుదల చేసింది. కొవిడ్‌-19 లక్షణాలు లేని, స్వల్ప లక్షణాలు ఉన్నవారితో పాటు హోం ఐసోలేషన్‌లో ఉన్నవారి కోసం ఈ మార్గదర్శకాలను విడుదల చేసింది. హోం ఐసోలేషన్‌ నుంచి 10 రోజుల తర్వాత బయటకు రావొచ్చని, చివరి మూడు రోజుల్లో జ్వరం రాకపోతే పరీక్ష అవసరంలేదని కేంద్రం జారీచేసిన కొత్త మార్గదర్శకాల్లో స్పష్టం చేసింది. 

కొత్త మార్గదర్శకాలు ఇవే..

* స్వల్ప లక్షణాలు లేదా లక్షణాలు లేని రోగులు హోం ఐసోలేషన్‌లో ఉండాలి. ఈ విషయాన్ని వైద్యులు ధ్రువీకరించాలి.

* రోగులు ఇంటికే పరిమితమవ్వాలి. బయటకు రావడానికి వీల్లేదు. 

* ఐసోలేషన్‌లో ఉండేవారికి సహాయం అందించేందుకు అన్నివేళలా సహాయకుడు ఉండాలి.

* ఐసోలేషన్‌ ముగిసేంతవరకూ రోగికి సంబంధించిన చికిత్స కోసం కేర్‌టేకర్‌కు, ఏదైనా దవాఖానా సిబ్బందికి మధ్య అనుసంధానం ఉండాలి. 

* రోగుల ఆక్సిజన్‌ స్థాయిలు ఎప్పటికప్పుడు పరీక్షించాలి.

* 60 ఏండ్లు పైబడిన వారిని, రక్తపోటు, మధుమేహం, గుండె సమస్యలు, ఊపిరితిత్తులు/కాలేయం/మూత్రపిండాలకు సంబంధించిన వ్యాధులు, సెరెబ్రో-వస్కులర్‌ వ్యాధులు ఉన్నవారిని వైద్యులు అనుమతించిన తర్వాతనే హోంఐసోలేషన్‌లో ఉంచాలి.

* రోగికి సాయం చేసే కేర్‌టేకర్‌, కుటుంబ సభ్యులు.. వైద్యుల సలహాతో హైడ్రాక్సీక్లోరోక్విన్‌, ప్రోపిలాక్సీస్‌ ఔషధాలను వాడాలి.

కరోనా లక్షణాలు ఉన్న రోగులు... 

* రోగులు గోరువెచ్చని నీటిని పుక్కిలించడం, రోజుకు రెండుసార్లు ఆవిరి పట్టడం చేయాలి.

* ఇతర ఆరోగ్య సమస్యలు ఉన్నవాళ్లు సంబంధిత వైద్యుని సలహాతో మందులు వాడాలి.

* రోజుకు 4 సార్లు పారాసెటమాల్‌ 650 ఎంజీ వాడినప్పటికీ జ్వరం తగ్గకపోతే వైద్యున్ని సంప్రదించాలి. 

* నాన్‌-స్టెరాయిడల్‌ యాంటీ-ఇన్‌ఫ్లెమేటరీ డ్రగ్‌ (ఎన్‌ఎస్‌ఏఐడీ)లు వైద్యుల సూచన మేరకు వాడొచ్చు. 

* బాధితులు, కేర్‌టేకర్లు మూడు పొరల మాస్కు వాడకం తప్పనిసరి. రోగులు వీలైనంత ఎక్కువగా నీరు, ద్రవ ఆహారం తీసుకోవాలి.

* తేలికపాటి లక్షణాలుంటే నోటి ద్వారా స్టెరాయిడ్లు తీసుకోవద్దు. వారం రోజులైనా జ్వరం, దగ్గు ఉంటే వైద్యున్ని సంప్రదించాలి.

* 10 రోజుల అనంతరం హోంఐసోలేషన్‌ నుంచి బయటకు రావొచ్చు. చివరి మూడు రోజుల్లో జ్వరం లేకపోతే పరీక్ష అవసరంలేదు.