యూనియన్ బ్యాంకులో ఉద్యోగాల జాతర... వేతనం రూ.85 వేలు..

ప్రభుత్వ రంగ బ్యాంకుల్లో ఒకటైన యూనియన్ బ్యాంక్ ఆఫ్ ఇండియాలో భారీ స్థాయిలో ఉద్యోగాలను భర్తీ చేయనున్నారు. ఈ బ్యాంకులో ఖాళీగా ఉన్న అనేక పోస్టుల భర్తీకి నోటిఫికేషన్ జారీచేసింది. ఇందులో 1500 లోకల్ బ్యాంక్ ఆఫీసర్ పోస్టులు కూడా ఉన్నారి. వీటి భర్తీకి రిక్రూట్మెంట్ డ్రైవ్ నిర్వహించనుంది. 

దేశవ్యాప్తంగా ఖాళీగా ఉన్న 1500 పోస్టులను 2024-25 ఆర్థిక సంవత్సరంలో భర్తీ చేయాలని యూనియన్ బ్యాంక్ (యూబీఐ) నిర్ణయం తీసుకుంది. ఇందులో తెలుగు రాష్ట్రాలకు సంబంధించి ఆంధ్రప్రదేశ్ రాష్ట్రాని 200, తెలంగాణకు 200 పోస్టులను కేటాయించింది.

ఈ పోస్టులకు సంబంధించి రిక్రూట్మెంట్ ఆన్‌లైన్ దరఖాస్తుల ప్రక్రియ ఈ నెల 24వ తేదీన ప్రారంభమైంది. ఆసక్తిగల యువతీయువకులు నవంబరు 13వ తేదీ వరకూ దరఖాస్తులు చేసుకోవచ్చు. ఈ పోస్టులకు గుర్తింపు పొందిన విశ్వవిద్యాలయం నుంచి బ్యాచిలర్ డిగ్రీ అర్హతగా యూనియన్ బ్యాంక్ నిర్ణయించింది. 

డిగ్రీ పూర్తి చేసి 20 నుంచి 30 సంవత్సరాల లోపు వయసు కలిగిన వారు ఈ పోస్టులకు ధరఖాస్తు చేసుకోవచ్చు. ఎస్సీ, ఎస్టీ అభ్యర్థులకు వయసులో ఐదేళ్ల సడలింపు ఇచ్చింది. అలానే ఓబీసీ కేటగిరికి చెందిన వారికి 3, జనరల్ పీడబ్ల్యూడీ అభ్యర్థులకు పది సంవత్సరాలు వయో పరిమితి సడలింపు వర్తిస్తుందని వెల్లడించింది.

దరఖాస్తు రుసుము విషయానికి వస్తే జనరల్ అభ్యర్థులు రూ.850లు చెల్లించాల్సి ఉంటుంది. ఎస్సీ, ఎస్టీ, పీడబ్యూడీ అభ్యర్థులు మాత్రం దరఖాస్తు రుసుముగా కేవలం రూ.175లు చెల్లించాల్సి ఉంటుంది. జీతం రూ.48,480ల నుంచి రూ.85,920ల వరకు ఉంటుందని తెలిపింది. అర్హులైన అభ్యర్ధులకు ముందుగా రాత పరీక్ష నిర్వహిస్తారు. రాత పరీక్షలో ఉత్తీర్ణులై అర్హత సాధించిన వారికి నేరుగా ఇంటర్వ్యూ నిర్వహించి ఎంపిక చేయనున్నారు.