అమెరికాలో ప్రతి ఏటా నిర్వహించే స్పెల్లింగ్ బీ పోటీలు ఆ దేశంలోనే కాకుండా ప్రపంచవ్యాప్తంగా ప్రసిద్ధి చెందినవి. స్పెల్లింగ్ బీ కాంటెస్ట్‌లో అనేక పదాలకు స్పెల్లింగ్‌లను చెప్పాల్సి ఉంటుంది. ఇందులో చాలా రౌండ్‌లు ఉంటాయి. ఒక్కో రౌండ్‌లో గెలుస్తూ ఫైనల్ స్టేజ్‌కు వెళ్లి ఆ రౌండ్‌లో అడిగిన అక్షరాల స్పెల్లింగ్‌ను సరిగ్గా చెప్పిన వారికి స్పెల్లింగ్ బీ ప్రైజ్‌ను అందిస్తారు. అయితే ఈ కాంటెస్ట్‌లో 14లోపు వయసున్న పిల్లలు మాత్రమే పాల్గొనాలి.
కాగా భారతదేశానికి చెందిన నవనీత్ మురళి అనే బాలుడు ఈ స్పెల్లింగ్ బీ పోటీల్లో అరుదైన ఘనతను సాధించాడు. ప్రతి ఏడాది అమెరికాలో నిర్వహించే స్పెల్లింగ్ బీ పోటీలను ఈ ఏడాది కూడా ఐదు ప్రాంతాలలో నిర్వహించగా నవనీత్ మొదటి బహుమతి గెలుచుకున్నాడు. ఫ్లిప్ (FLIPE) అనే అక్షరం స్పెల్లింగ్ కరెక్ట్‌గా చెప్పడంతో నవనీత్ మూడు వేల డాలర్ల (రూ. 2 లక్షల 14 వేలు) ప్రైజ్‌మనీ గెలుచుకున్నాడు.
కాగా, ప్రణవ్ నందకుమార్ (13), వయుణ్ కృష్ణ (12) తదితరులు రన్నరప్‌లుగా నిలిచారు. దేశవ్యాప్తంగా ఎందరో పిల్లలు ఈ కాంటెస్ట్‌లో పాల్గొంటున్నారని.. ఈ కార్యక్రమాన్ని మరింత విస్తృతంగా తీసుకెళ్తామని స్పెల్లింగ్ బీ ఫౌండర్ రాహుల్ వాలియా తెలిపారు. గెలిచిన వారందరికి ఆయన అభినందనలు తెలియజేశారు.