నిరుద్యోగులకు గుడ్‌న్యూస్... ఫ్లిప్‌కార్ట్‌లో 70 వేల ఉద్యోగ అవకాశాలు

కరోనా కష్టాల్లో ఉన్న నిరుద్యోగులకు ఓ శుభవార్త. ప్రముఖ ఆన్‌లైన్ ట్రేడింగ్ కంపెనీ దిగ్గజాల్లో ఒకటైన ఫ్లిప్‌కార్ట్ త్వరలో 70 మందికి ప్రత్యక్షంగా ఉపాధి కల్పించనుంది. అలాగే, లక్షలాది మందికి పరోక్షంగా ఉపాధిని కల్పించబోతున్నట్టు ప్రకటించింది. 

భారత్‌లో అక్టోబరు మొదలుకుని జనవరి సంక్రాంతి వరకు పండగ సీజన్. ఈ పండుగ సీజన్‌తో పాటు.. బిగ్‌ బిలియన్‌ డేస్‌(బీబీడీ) దృష్టిలో పెట్టుకొని దేశవ్యాప్తంగా ప్రత్యక్షంగా 70 వేల మందిని, పరోక్షంగా లక్షలాది మందికి ఉపాధిని కల్పించబోతున్నది. 

బెంగళూరు కేంద్రస్థానంగా ఈ-కామర్స్‌ సేవలు అందిస్తున్న ఫ్లిప్‌కార్ట్‌.. సరఫరా వ్యవస్థను మరింత బలోపేతం చేయడానికి డెలివరీ ఎగ్జిక్యూటివ్‌లు, ప్యాకర్లు, స్టోర్‌ కీపర్లు, మానవ వనరుల విభాగంలో మరింత మందిని నియమించుకోబోతున్నట్లు కంపెనీ వర్గాలు వెల్లడించాయి. 

బిగ్‌ బలియన్‌ డేస్‌ సందర్భంగా మరిన్ని అవకాశాలు కల్పిస్తూనే వినియోగదారులకు గొప్ప అనుభవాన్ని ఇచ్చేందుకు ప్రభావంతమైన భాగస్వామ్యాలు సృష్టించడంపై దృష్టి సారించినట్లు కంపెనీ సీనియర్‌ వైస్‌ ప్రెసిడెంట్‌ అమితేష్‌ జా తెలిపారు.