ఈ సంవత్సరంలో మరో నెల కాల చక్రంలో కలిసిపోనుంది. జూలై నెల మరో రెండు రోజుల్లో ముగియనుంది. ఆగస్టు నెలలో పలు ఆర్థికపరమైన నిబంధనలు, మార్పులు అమల్లోకి రానున్నాయి. ముఖ్యంగా, ఎల్‌పీజీ సిలిండర్‌ ధర, క్రెడిట్‌ కార్డు రూల్స్‌ వంటివి అందులో ఉన్నాయి. వీటితో పాటు వచ్చే నెల బ్యాంకులకు ఎన్ని రోజులు సెలవులు రాబోతున్నాయో తెలుసుకునే ప్రయత్నం చేద్దాం.
ఆగస్టు నెలలో దేశవ్యాప్తంగా బ్యాంకులకు 13 రోజులు సెలవులు రానున్నాయి. తెలుగు రాష్ట్రాల్లో శని, ఆదివారాల్లో వచ్చే సెలవులతో కలుపుకొంటే 8 రోజుల పాటు బ్యాంకులకు సెలవులు రానునున్నాయి. స్వాతంత్ర్య దినోత్సవం సందర్భంగా ఆగస్టు 15న, కృష్ణాష్ణమి సందర్భంగా ఆగస్టు 26న బ్యాంకులు తెరుచుకోవు. రెండు, నాలుగో శని వారాలు, ఆదివారం బ్యాంకులకు ఎలానూ సెలవే. దాని బట్టి మీ బ్యాంకు పనులను ప్లాన్‌ చేసుకోండి.
అలాగే, ఎల్‌పీజీ గ్యాస్ సిలిండర్‌ ధరలను ప్రతినెలా ఒకటో తేదీన సవరిస్తూ ఉటారు. గత నెల 19 కేజీల కమర్షియల్ గ్యాస్ సిలిండర్‌ ధరను తగ్గించారు. అంతర్జాతీయంగా ధరలు తక్కువగా ఉండడంతో మరోసారి తగ్గే అవకాశం ఉందని మార్కెట్‌ వర్గాలు భావిస్తున్నాయి.
ఇకపోతే, ప్రైవేటురంగానికి చెందిన హెచ్‌డీఎఫ్‌సీ క్రెడిట్‌ కార్డు నిబంధనల్లో కీలక మార్పులు చేసింది. ఇకపై క్రెడ్‌, చెక్‌, మోబిక్విక్‌, ఫ్రీఛార్జ్‌ వంటి వేదికల ద్వారా అద్దె చెల్లిస్తే శాతం ఫీజుగా చెల్లించాల్సి ఉంటుంది. రూ.15 వేలు పైబడి చేసే ఫ్యూయల్‌ చెల్లింపులకూ ఒక శాతం చొప్పున చెల్లించాల్సి ఉంటుంది.