టీనేజ్ అమ్మాయిల అందానికి మెరుగులు ఎలా?

టీనేజ్ యువతులు తమతమ శరీరం కాంతివంతంగా అందంగా వుండాలని కోరుకుంటారు. ఇందుకోసం ఏవేవో క్రీములు రాస్తూ వున్న అందాన్ని పోగొట్టుకుంటారు. అలా కాకుండా ఇంట్లోనే చిన్నచిన్న చిట్కాలతో అందంగా వుండొచ్చు. అదెలాగో చూద్దాం.

* శరీర కాంతి నిగనగలాడేందుకు నిమ్మకాయ ఎంతో ఉపయోగపడుతుంది. నిమ్మకాయను పలు ఫేస్ ప్యాక్‌లలో ఉపయోగించి వాడుతుంటారు. దీంతో శరీర మేనిఛాయ మెరుగౌతుంది. 

* చర్మం నల్లగా ఉంటే దానిని రూపుమాపేందుకు పాల మీగడలో నిమ్మకాయ రసాన్ని కలుపుకుని ముఖానికి రాయండి. కాసేపయ్యాక గోరువెచ్చని నీటితో ముఖాన్ని కడిగేయండి. 

* మోకాళ్ళు, మోచేతులపైనున్న నలుపుదన్నాన్ని దూరం చేసేందుకు నిమ్మకాయ తొక్కతో రుద్దండి. దీంతో నలుపుదనం తొలగిపోతుంది. 

* మేని ఛాయను మెరుగుపరచుకునేందుకు టమోటా రసంలో కాసింత పసుపు పొడి కలుపుకుని మీ ముఖానికి పూయండి. కాసేపయ్యాక చల్లటి నీటితో మీ ముఖాన్ని కడిగేయండి. దీంతో అందం మరింత రెట్టింపవుతుంది. 

* ద్రాక్ష రసంలో తేనె కలుపుకుని ముఖానికి పూయండి. దీంతో మీ ముఖారవిందం పెరుగుతుంది.

* ప్రతి రోజు మీరు స్నానం చేసేటప్పుడు వేపనూనెతో తయారు చేసిన సబ్బును వాడండి లేదా నాలుగు చుక్కలు డెటాల్ కలుపుకుని స్నానం చేయండి. దీంతో ముఖంపై నున్న మొటిమలు తొలగిపోతాయి.  

* చందనపు పేస్ట్‌లో గులాబీ జలాన్ని (రోజ్ వాటర్) కలుపుకుని మొటిమలపై పూయండి. ఈ లేపనాన్ని కనీసం అరగంట ఉంచండి. ఆ తర్వాత చల్లటి నీటితో కడిగేయండి. ఇలా ప్రతి 15 రోజులపాటు చేయండి. ఈ 15 రోజులలో మొటిమలను దూరం చేసుకోవచ్చు. 

* పుదీనాను రుబ్బుకుని మొటిమలకు రాయండి. ఇలా 15 రోజులపాటు ప్రతి రోజూ అరగంటపాటు పూస్తే ఉపశమనం కలుగుతుంది. 

* తులసి ఆకుల రసాన్ని టమోటాల రసంలో కలుపుకుని మొటిమలకు పూస్తే ఫలితం ఉంటుంది.