మా నాన్న పేరు పెట్టడం ముమ్మాటికీ తప్పే : వైఎస్ షర్మిల

విజయవాడలోని ఎన్టీఆర్ ఆరోగ్య విశ్వవిద్యాలయానికి తన తండ్రి డాక్టర్ వైఎస్.రాజశేఖర్ రెడ్డి పేరు పెట్టడాన్ని తాను కూడా సమర్థించబోనని వైఎస్ఆర్ తెలంగాణ పార్టీ అధ్యక్షురాలు, వైఎస్ఆర్ కుమార్తె వైఎస్. షర్మిల అన్నారు.

విజయవాడలోని ఎన్టీఆర్ హెల్త్ యూనివర్శిటీకి ఎన్టీఆర్ పేరును తొలగించి వైఎస్ఆర్ పేరు పెడుతూ ఏపీ అసెంబ్లీ బుధవారం ఓ బిల్లును ఆమోదించింది. దీనిపై అన్ని వర్గాల నుంచి తీవ్ర వ్యతిరేకత, నిరసనలు వ్యక్తమవుతున్నాయి. ఈ నేపథ్యంలో పేరు మార్పుపై వైఎస్ఆర్ కుమార్తె వైఎస్.షర్మిల మాట్లాడుతూ, ఇలా పేర్లు మార్చడం సరికాదన్నారు. పేర్లు మారిస్తే దానికున్న విలువ పోతుందన్నారు. 

ఏవో కారణాల వల్ల ఒక పేరు పెడతారని, ఆ పేరును అలాగే కొనసాగిస్తే తరతరాలకుగా వారికి గౌరవం ఇచ్చినట్టుగా ఉంటుందన్నారు. జనాల్లో గందరగోళాన్ని పొగొట్టినట్టు ఉంటుందన్నారు. ఒక్కొక్కరు ఒక్కో పేరు పెట్టుకుంటూ పోతే ఎవరు ఏం చేస్తున్నారో కూడా జనాలకు అర్థం కాకుండా పోతుందన్నారు.

తన తండ్రి చనిపోయిన తర్వాత ఆయనను కాంగ్రెస్ నేతలు పట్టించుకోలేదని షర్మిల మండిపడ్డారు. ఎన్నికల సమయంలో తన తండ్రి పేరును వాడుకుంటారని... ఎన్నికలు అయిపోయిన తర్వాత మర్చిపోతారని విమర్శించారు. వైఎస్సార్‌కు తానే అసలైన రాజకీయ వారసురాలినని, కాంగ్రెస్ పార్టీ కాదని ఆమె ఓ ప్రశ్నకు సమాధానమిచ్చారు.