జీరో ఎఫ్ఐఆర్... ఇదొకటుందనే విషయం చాలా మందికి తెలియదు. అంతెందుకు పోలీసు శాఖలో పని చేసే చాలా మంది పోలీసులకే తెలియదు. ఇది ఇపుడు ఎందుకు ప్రస్తావనకు వచ్చిందంటే... ప్రియాంక రెడ్డి తల్లిదండ్రులు పోలీసుల ధగ్గరికి వెళితే అది మాపరిధి కాదు అని శంశాబాద్ పరిధి అనీ కాదు.. కాదు శంశాబాద్ రూరల్ పరిధి అని తిప్పిపంపారు.
ఈ సమస్య ఇప్పుడే కాదు... ప్రతి పోలిస్ స్టేషన్‌లోనూ జరిగే ప్రహసనమే... పోలీసులు చాలా సందర్భాలలో బాధ్యత నుంచి తప్పుకోవడానికి మా పరిధి కాదు అనే ఆయుధాన్ని వాడుతుంటారు. నిజానికి ఇది తప్పు. మనమొక ఫిర్యాదుతో ఏ పోలిస్ స్టేషన్‌కు వెళ్ళినా వారు తప్పకుండా ఆ ఫిర్యాదు తీసుకోవాలి. మా పరిధి కాదు అని వాళ్ళు అంటే జీరో ఎఫ్ఐఆర్ చెయ్యండి అని మనం అడగాలి. అప్పుడు జీరో ఎఫ్ఐఆర్ చెయ్యాల్సిందే..
ఇంతకూ జిరో ఎఫ్ఐఆర్ అంటే ఏమిటి?
మన ఫిర్యాదు ఏ స్టేషన్ పరిధి లోదో తేలనపుడు మనం ఎక్కడైతే ఫిర్యాదు చేసామో అక్కడ జీరో ఎఫ్‌ఐఆర్‌గా నమోదు చేసి తర్వాత సంబంధిత స్టేషన్ ఏదో తెలుసుకుని ఆ ఎఫ్‌ఐ‌ఆర్‌ను ఆ స్టేషన్‌కు పోలీసులు బదిలీ చేయాలి.
ఇంకా చెప్పాలంటే ఏ పరిధిలోదో తెలిసినా సరే మనం ఫిర్యాదును వేరే స్టేషన్‌లో చేసి జీరో ఎఫైఆర్ చేయండి అని అడిగితే అక్కడ నమోదు చేయాల్సిందే. ఇది నియమం. మా పరిధి కాదు అని ఏ పోలిస్ స్టేషనూ అనడానికి వీలు లేదు. జీరో ఎఫ్ఐఆర్ గురించి నిజానికి ప్రజల కంటే ముందు పోలిస్ ఆఫీసర్లే తెలుసుకోవాలి.