బాక్సాఫీస్ కలెక్షన్లపై 'ఉరి' సర్జికల్ దాడులు

పాక్ ఆక్రమిత కాశ్మీర్‌లోని తీవ్రవాద సంస్థలపై భారత ఆర్మీ జరిపిన మెరుపు దాడులు (సర్జికల్ స్ట్రైక్స్) ఆధారంగా చేసుకుని నిర్మించిన చిత్రం "ఉరి". ఈ చిత్రం బాలీవుడ్‌లో బాక్సాఫీస్ వద్ద కలెక్షన్ల వర్షం కురిపిస్తోంది. విక్కీ కౌషల్ నటించిన చిత్రానికి అద్భుతమైన రెస్పాన్స్ వచ్చింది. 

జ‌మ్మూకాశ్మీర్‌లోని ఉరి సెక్టార్‌లో ఉన్న సైనిక స్థావ‌రంపై పాక్ ఉగ్ర‌వాదులు దాడి చేసి భార‌త జ‌వాన్ల‌ను చంపేస్తారు. ఆ దాడికి ప్ర‌తీకారంగా భార‌త సైన్యం అత్యంత ర‌హ‌స్యంగా స‌ర్జిక‌ల్ దాడుల‌ను నిర్వ‌హిస్తుంది. ఆస‌క్తిక‌ర‌మైన రీతిలో చిత్రాన్ని రూపొందించారు. ఈ చిత్రానికి ఆదిత్య ధర్ దర్శకత్వం వహించగా, యామీ గౌతమ్, పరేష్ రావల్, మోహిత్ రైనా, కీర్తి కుల్హారీ వంటి నటీనటులు నటించారు. 

'ఉరి ద స‌ర్జిక‌ల్ స్ట్ర‌ైక్' పేరుతో వచ్చిన ఈ చిత్రం రూ.100 కోట్ల క్లబ్‌లో చేరింది. ఈ నెల 11వ తేదీన రిలీజైన ఈ సినిమా ఇప్ప‌టికే రూ.వంద కోట్లు రాబ‌ట్టింది. ఈ చిత్రం తొలివారంలో రూ.70.94 కోట్లు, రెండో వారంలో రూ.37.96 కోట్లు కలుపుకుని మొత్తం 108.90 కోట్లు సాధించినట్టు బాలీవుడ్ ట్రేడ్ అనలిస్టు తరణ్ ఆదర్శ్ ఓ ట్వీట్‌లో వెల్లడించారు. పైగా, 2019లో వంద కోట్ల క్లబ్‌లో చేరిన తొలి చిత్రంగా ఇది నిలిచింది.