దేశ వ్యాప్తంగా తగ్గిన ఉష్ణోగ్రతలు... తెలుగు రాష్ట్రాల్లో వర్ష బీభత్సం

దేశ వ్యాప్తంగా పగటి ఉష్ణోగ్రతలు తగ్గాయి. అదేసమయంలో తెలుగు రాష్ట్రాల్లో అడపాదడపా వర్షాలు పడుతున్నాయి. విదర్భ నుంచి కర్ణాటక, తెలంగాణ, రాయలసీమల మీదుగా తమిళనాడు వరకు ఉపరితల ద్రోణి కొనసాగుతోందని తెలిపారు. దీని ప్రభావంతో వర్షాలకు అవకాశం ఏర్పడిందన్నారు.

ఈ కారణంగా దేశవ్యాప్తంగా ఉష్ణోగ్రతల తీవ్రత కూడా తగ్గిందని హైదరాబాద్‌లోని వాతావరణ కేంద్రం అధికారులు తెలియజేశారు. దీంతోపాటు గురువారం రాష్ట్రంలోని అత్యధిక ప్రాంతాల్లో ఉష్ణోగ్రతలు సాధారణ స్థాయిలోనే నమోదయ్యాయని తెలిపారు. ఈ పరిస్థితి మరో రెండుమూడు రోజుల వరకు కొనసాగే అవకాశం ఉందని వెల్లడించారు.

కాగా, గురువారం హైదరాబాద్‌లో వర్ష బీభత్సం సృష్టించింది. అలాగే, అనేక ప్రాంతాల్లో వర్షం కురిసింది. చిత్తూరు జిల్లాలోని పశ్చిమ మండలాల్లో ఈదురుగాలులతో కూడిన జల్లులు పడ్డాయి. పీలేరు, మదనపల్లె నియోజకవర్గాల పరిధిలో ఒక మోస్తరు వర్షం కురిసింది. కర్నూలు జిల్లా నంద్యాల ప్రాంతంలో వర్షం పడింది.