తెలంగాణ రాష్ట్రంలో మరో మైనర్ బాలిక లైంగికదాడికి గురైంది. ఈ దారుణం తెలంగాణ రాష్ట్రంలోని సిద్ధిపేటలో జరిగింది. ఆలస్యంగా వెలుగులోకి వచ్చిన ఈ ఘటన వివరాలను పరిశీలిస్తే, సిద్ధిపేటకు చెందిన మహేందర్ అనే పూజారీ ఎనిమిదో తరగతి బాలికపై మనసుపడ్డాడు. ఆ తర్వాత ఆ బాలికకు మాయమాటలు చెప్పి లోబరుచుకుని, ప్రేమాయణం కొనసాగిస్తూ వచ్చాడు. ఈ తంతు ఓ యేడాది కాలంగా సాగుతూ వస్తోంది.
పైగా, అదును చిక్కినపుడు గుడివెనుకకు తీసుకెళ్లి అత్యాచారం చేస్తూ వచ్చాడు. ఆమెను పెళ్లి చేసుకుంటానని చెప్పి, సన్నిహితంగా గడిపి, ఇందుకు సంబంధించిన ఫొటోలను తీశాడు. వీటిని మార్ఫింగ్ చేసి సోషల్ మీడియాలో అప్‌లోడ్ చేయగా, వాటిని బాధిత బాలిక తల్లిదండ్రులు చూసి పోలీసులకు ఫిర్యాదు చేశారు. దీంతో పోలీసులు పోక్సో చట్టం కింద కేసు నమోదు చేసి పూజారి మహేందర్ (23)ను అరెస్టు చేశారు.