పోలవరం నిర్వాసిత ప్రాంతాల్లో ప‌ర్య‌టించేందుకు వెళ్తోన్న టిడిపి జాతీయ ప్ర‌ధాన కార్య‌ద‌ర్శి నారా లోకేష్ మంగళవారం భ‌ద్రాచ‌లంలో సీతారామ‌చంద్ర‌మూర్తిని ద‌ర్శించుకున్నారు. అనంత‌రం ప‌ర్య‌ట‌న‌కి బ‌య‌లుదేరే స‌మ‌యంలో ప‌ల‌క‌రించిన మీడియా ప్ర‌తినిధులతో మాట్లాడారు.
రాజ‌కీయాల గురించి ప్ర‌శ్న‌లు అడిగితే..``దైవ‌ద‌ర్శ‌నం చేసుకుని వ‌చ్చాను, రాజ‌కీయాలు మాట్లాడ‌ను`` అంటూ సున్నితంగా తిర‌స్క‌రించారు. స్వామికి ఏమ‌ని మొక్కుకున్నార‌ని అడ‌గ్గా... ``క‌రోనా థ‌ర్డ్ వేవ్ హెచ్చ‌రిక‌లు వ‌స్తున్న నేప‌థ్యంలో, క‌రోనా క‌ష్టాలు క‌డ‌తేరాల‌ని, ప్ర‌జ‌లంతా ఆయురారోగ్యాల‌తో వుండాల‌ని, తెలుగు రాష్ట్రాలు స‌ఖ్య‌త‌తో ఉండి ప‌ర‌స్ప‌ర ప్ర‌యోజ‌నాలు గౌర‌వించుకుని, ప్ర‌గ‌తిప‌థంలో సాగాలి`` అని ప్రార్థించిన‌ట్టు తెలిపారు.
పోలవరం నిర్వాసితుల స‌మ‌స్య‌లు ప‌రిష్కారం కావాల‌ని సీతారామ‌చంద్ర‌మూర్తికి మొక్కుకున్నాన‌న్నారు. ఈ సంద‌ర్భంగా ఆంధ్ర‌ప్ర‌దేశ్‌-తెలంగాణ రాష్ట్రాల మ‌ధ్య భ‌ద్రాచ‌లం కేంద్రంగా స‌మ‌స్య‌గా వున్న 5 పంచాయ‌తీల గురించి మీడియా ప్ర‌తినిధులు ప్ర‌శ్నించారు. ఇరురాష్ట్రాల ముఖ్య‌మంత్రులు మంచి స్నేహితులు అనీ, వారు అనుకుంటే క్ష‌ణాల్లో ఈ స‌మ‌స్య ప‌రిష్కారం అవుతుంద‌ని స‌మాధానం ఇచ్చారు.