టీడీపీ చీఫ్ చంద్రబాబును కలిసిన సూపర్ స్టార్ రజనీకాంత్

తమిళ సూపర్ స్టార్ రజనీకాంత్ హైదరాబాద్ పర్యటనలో ఉన్నారు. ఆయన నటిస్తున్న తాజా చిత్రం "జైలర్". ఈ చిత్రం షూటింగ్ కోసం ఆయన భాగ్యనగరికి చేరుకున్నారు. ఇందుకోసం ఆయన రెండు రోజుల క్రితం చెన్నై నుంచి హైదరాబాద్‌కు చేరుకున్నారు. 

ఈ నేపథ్యంలో టీడీపీ చీఫ్ చంద్రబాబు నాయుడుతో రజనీకాంత్ భేటీ అయ్యారు. హైదరాబాద్ నగరంలోని చంద్రబాబు నివాసంలో ఈ సమావేశం జరిగింది. కేవలం మర్యాదపూర్వకంగానే చంద్రబాబును కలుసుకున్నట్టు రజనీ సన్నిహిత వర్గాల సమాచారం. 

పైగా, రజనీని కలుసుకున్న విషయాన్ని చంద్రబాబు స్వయంగా తన ట్విట్టర్ ఖాతాలో వెల్లడించారు. తన మిత్రుడు తలైవాను కలవడం ఆనందాన్నిచ్చిందని తెలుపుతూ ట్వీట్ చేశారు. 

అయితే, ఈ భేటీపై పలు రకాలైన ఊహాగానాలు వినిపిస్తున్నాయి. వచ్చే యేడాది ఏపీలో అసెంబ్లీ ఎన్నికలు జరుగనున్నాయి. ఈ ఎన్నికల్లో టీడీపీ, జనసేన పార్టీలు కలిసి పోటీ చేయడం దాదాపుగా ఖరారైపోయింది. అయితే, బీజేపీని కూడా తమతో చేర్చుకునేందుకు లోపల ప్రయత్నాలు జరుగుతున్నాయి. 

ఈ నేపథ్యంలో ప్రధాని మోడీ, కేంద్ర హోం మంత్రి అమిత్ షాతో సన్నిహిత సంబంధాలు ఉన్న రజనీకాంత్ ద్వారా టీడీపీ - జనసేన - బీజేపీలు కలిసి పోటీ చేసేలా ప్రయత్నాలు జరుగుతున్నాయా? అనే సందేహం కలుగుతోంది.