తెలుగు రాష్ట్రాల్లో ఎండలు మండిపోతున్నాయి. దీంతో జనం ఉక్కిరిబిక్కిరైపోతున్నారు. వేసవి తాపం నుంచి ఉపశమనం పొందేందుకు తోచిన చిట్కాలు పాటిస్తున్నారు. మందుబాబులు మాత్రం చల్లటి బీర్లను సేవిస్తూ హాయిగా ఉపశమనం పొందుతున్నారు. వేసవితాపం నుంచి ఉపశమనం పొందేందుకు ప్రతి ఒక్కరూ చల్లచల్లని బీరువైపు మొగ్గుతున్నారు. దీంతో రాష్ట్రంలో లిక్కర్‌తో పోటాపోటీగా బీరు అమ్మకాలు సాగుతున్నాయి.
సాధారణంగా లిక్కర్‌తో పోలిస్తే బీరు అమ్మకాలు మూడో వంతే ఉంటాయి. రాష్ట్రంలో రోజుకు సగటున లక్ష కేసుల లిక్కర్‌ అమ్మితే, 30 వేల కేసుల బీరు అమ్ముతారు. వారం రోజులుగా ఉష్ణోగ్రతలు భారీగా పెరిగిపోవడంతో అందుకు తగినట్టుగా బీరు అమ్మకాలు ఊపందుకున్నాయి. గత నెల 30న రాష్ట్రంలో 90 వేల కేసుల లిక్కర్‌ అమ్మితే, 80 వేల కేసుల బీరు అమ్ముడైంది.
అలాగే 31వ తేదీన 95 వేల కేసుల లిక్కర్‌, 85 వేల కేసుల బీరు అమ్మకాలు జరిగాయి. ఇక ఈ నెల 3న 62 వేల కేసుల లిక్కర్‌ అమ్మితే, అంతకుమించి 68 వేల కేసుల బీరు అమ్ముడైంది. సాధారణంగా ఏపీలో బీరుకు డిమాండ్‌ చాలా తక్కువగా ఉంటుంది. ఎండలు తీవ్రంగా ఉన్నా మందుబాబులు ఎక్కువగా లిక్కర్‌కే మొగ్గుచూపుతారు.
కానీ ఈ సంవత్సరం విచిత్రంగా లిక్కర్‌ అమ్మకాలను దాటి బీరు విక్రయాలు జోరందుకున్నాయి. కాగా గతంలో ఉన్న పాపులర్‌ బ్రాండ్ల బీర్లు ప్రస్తుతం రాష్ట్రంలో అందుబాటులో లేవు. ముఖ్యంగా కింగ్‌ఫిషర్‌, నాకౌట్‌, బడ్వైజర్‌ వంటి బ్రాండ్ల బీర్లు అక్కడక్కడా మినహా ఎక్కువ షాపుల్లో అందుబాటులో ఉండటం లేదు.
వైసీపీ ప్రభుత్వం అధికారంలోకి వచ్చాక కొత్తగా తెరపైకి వచ్చిన బూమ్‌ బూమ్‌, బీరా, బ్లాక్‌ బస్టర్‌ లాంటి కొత్త బ్రాండ్లే షాపుల్లో ఉంటున్నాయి. అయినా వినియోగదారులు వేరే దారిలేక వాటినే కొనుగోలు చేస్తున్నారు. గతంతో పోలిస్తే బీర్లు ధరలు కూడా బాగా పెరిగాయి. గత ప్రభుత్వంలో ఒక్కో బీరు ధర రూ.100 నుంచి రూ.120 ఉంటే.. ఇప్పుడు కనీసం రూ.220కు చేరింది.
ఆ స్థాయిలో ధరలు పెరిగినా ఎండల్లో లిక్కర్‌ తాగలేక వినియోగదారులు బీరుకు మొగ్గుచూపుతున్నారు. దీంతో ప్రభుత్వానికి ఆదాయం భారీగా పెరుగుతోంది. సాధారణంగా లిక్కర్‌ కంటే బీరు ఎక్కువ మోతాదులో తాగుతారు. దీనివల్ల వేసవిలో మద్యం అమ్మకాలు పెరిగి, దానివల్ల ప్రభుత్వానికి ఆదాయం పెరిగే అవకాశం ఉంది.