ఆర్ఆర్ఆర్ సినిమా చూశాను... కళ్లు చెదిరిపోయాయి.. ఆర్ఆర్ఆర్

ఎస్ఎస్ రాజమౌళి దర్శకత్వం వహించిన చిత్రం "ఆర్ఆర్ఆర్". జూనియర్ ఎన్టీఆర్, రామ్ చరణ్‌లు నటించగా, డీవీవీ దానయ్య భారీ బడ్జెట్‌తో తెరకెక్కించారు. గత శుక్రవారం విడుదలైన ఈ చిత్రానికి ప్రపంచ వ్యాప్తంగా బ్రహ్మరథం పడుతున్నారు. ఈ చిత్రాన్ని సాధారణ ప్రేక్షకుల మొదలుకుని సెలెబ్రిటీల వరకు థియేటర్లకు వెళ్లి చూస్తున్నారు. ఇలాంటివారిలో వైకాపా రెబెల్ ఎంపీ రఘురామకృష్ణంరాజు (ఆర్ఆర్ఆర్) కూడా ఉన్నారు. 

ఈయన ఈ చిత్రాన్ని చూసిన తర్వాత తన స్పందనను తెలిపారు. "ఆర్ఆర్ఆర్ సినిమాను చూశాను. కళ్లు చెదిరిపోయాయంటే అతిశయోక్తి కాదు. భీమ్ పాత్రలో ఎన్టీఆర్, రామ్ చరణ్ అద్భుతమైన నటన కనబరిచారు. వెండితెరపై కథలు చెప్పడంలో తనకు తిరుగులేదని రాజమౌళి మరోమారు నిరూపించుకున్నారు. ఇంటి భారీ విజయాన్ని సాధించిన యావత్ చిత్ర బృందానికి శుభాభినందనలు తెలియజేస్తున్నాను" అని పేర్కొన్నారు.