ఆంధ్రప్రదేశ్ రాష్ట్రంలోని వెలుగు పరిధిలో పనిచేస్తున్న మండల సమాఖ్య క్లస్టర్‌ కోఆర్డినేటర్ల (ఎంఎస్‌సీసీ) ఆశలపై సీఎం జగన్మోహన్ రెడ్డి ప్రభుత్వం నీళ్లు చల్లింది. ఆర్థిక ఇబ్బందుల దృష్ట్యా వేతనాలు పెంచలేమని తేల్చి చెప్పేసింది. ఎఫ్‌టీఈ హెచ్‌ఆర్‌ పాలసీలోకి తీసుకురావడమూ కుదరదని తేల్చిచెప్పింది.
ఈ మేరకు పంచాయతీరాజ్‌, గ్రామీణాభివృద్ధి శాఖ ప్రత్యేక ప్రధాన కార్యదర్శి రాజశేఖర్‌ ఈ నెల 4వ తేదీన మెమో జారీ చేశారు. రాష్ట్రవ్యాప్తంగా ఎంఎస్‌సీసీలు 1100 మంది వరకున్నారు. దీనిపై సెర్ప్‌ సీఈవో ఇంతియాజ్‌ వివరణ కోరగా సంబంధిత దస్త్రం తమకు ఇంకా చేరలేదని అన్నారు.
ఎంఎస్‌సీసీలు, అకౌంటెంట్లకు వేతనాలు పెంచుతామని, హెచ్‌ఆర్‌ పాలసీ అమలుచేయిస్తామని వెలుగు, వైకేపీలో పనిచేస్తున్న కొంతమంది నుంచి పంచాయతీరాజ్‌శాఖ పరిధిలోని ఓ అధికారి అక్రమ వసూళ్లకు పాల్పడ్డారని అప్పట్లో ఆరోపణలొచ్చాయి.
పలువురి వద్ద రూ.20 వేల నుంచి రూ.36 వేల వరకు వసూలు చేశారన్న ఆరోపణలున్నాయి. పని అయ్యే వరకు విషయాన్ని ఎక్కడా బయటపెట్టొద్దని సంబంధిత సంఘం నాయకుడు టెలీకాన్ఫరెన్స్‌ ద్వారా వివరించడం అప్పట్లో వైరల్‌ అయింది. దీంతో వసూళ్ల బాగోతం వెలుగుచూసింది.