కృష్ణానది కరకట్టపై సుమారుగా 60 అక్రమ నిర్మాణాలు ఉన్నాయనీ, వాటన్నింటిని కూల్చివేయక తప్పదని మంగళగిరి ఎమ్మెల్యే ఆళ్ళ రామకృష్ణారెడ్డి (ఆర్కే) వెల్లడించారు. ముఖ్యంగా, టీడీపీ అధినేత, మాజీ ముఖ్యమంత్రి నారా చంద్రబాబు నాయుడు ఉంటున్న నివాసం కూడా అక్రమ నిర్మాణమే అని, దాన్ని కూడా కూల్చివేయక తప్పదని ఆర్కే అంటున్నారు.
కరకట్టపై గత టీడీపీ ప్రభుత్వం అక్రమంగా నిర్మించిన ప్రజావేదికను ముఖ్యమంత్రి వైఎస్. జగన్ మోహన్ రెడ్డి కూల్చివేయాల్సిందిగా ఆదేశాలు జారీ చేశారు. దీంతో ఈ ప్రజావేదిక భవనం కూల్చివేత పనులు మంగళవారం రాత్రి నుంచి ప్రారంభించారు. ప్రస్తుతం ఈ పనులు జోరుగా సాగుతున్నాయి. బుధవారం సాయంత్రానికికల్లా ఈ కూల్చివేత పనులు ముగియనున్నారు.
ఈ నేపథ్యలో కరకట్టపై ఉన్న అక్రమ నిర్మాణాలపై మంగళగిరి ఎమ్మెల్యే ఆళ్ళ రామకృష్ణారెడ్డి మాట్లాడుతూ, కరకట్టపై దాదాపుగా 60కి పైగా అక్రమ నిర్మాణాలు ఉన్నాయనీ, వాటన్నింటిని కూల్చివేయాలని కోరారు. అదేసమయంలో టీడీపీ అధినేత చంద్రబాబు నాయుడు ఉంటున్న నివాసం కూడా అక్రమ నిర్మాణమేనని, అందువల్ల ఆయన తక్షణం ఇంటిని ఖాళీ చేసి, ఇతరులకు మార్గదర్శకంగా నిలవాలని ఆర్కే సూచన చేశారు.
ప్రజా వేదిక కూల్చివేతను జనం హర్షిస్తున్నారని, అటువంటి పరిస్థితుల్లో అక్రమ కట్టడంలో ఉన్న చంద్రబాబు ఇంకా అక్కడే ఉండాలని అనుకోవడం సబబు కాదన్నారు. అయినా చంద్రబాబును తాను వదిలి పెట్టేది లేదన్నారు. కరకట్టమీద 60కిపైగా అక్రమ నిర్మాణాలు ఉన్నాయని, వాటన్నింటికీ నోటీసులు జారీ చేయించినట్లు తెలిపారు. వాస్తవానికి ఈనెల 21వ తేదీనే ఈ కేసులన్నీ న్యాయస్థానం ముందుకు రావాల్సి ఉందన్నారు. అయితే వ్యవస్థల్ని మేనేజ్‌ చేయడంలో చంద్రబాబు సమర్థుడన్నారు. అక్రమ నిర్మాణాలపై నోటీసులు అందుకున్న వారంతా తమంత తాము కట్టడాలను ఖాళీ చేయాలని ఆయన కోరారు.