ఆంధ్ర, రాయలసీమ జిల్లాల్లో భారీ వర్షాలు..

రానున్న రెండు రోజుల పాటు ఆంధ్రప్రదేశ్‌లోని పలు ప్రాంతాల్లో భారీ వర్షాలు కురిసే అవకాశం ఉందని వాతావరణ శాఖ తెలిపింది. దక్షిణ కోస్తా ఆంధ్ర, రాయలసీమ జిల్లాల్లో బుధవారం భారీ వర్షాలు కురిసే అవకాశం ఉంది.

కొమోరిన్ ప్రాంతం నుంచి ఆంధ్రప్రదేశ్ మీదుగా పశ్చిమ మధ్య బంగాళాఖాతం వరకు ద్రోణి విస్తరించిందని వాతావరణ శాఖ తెలిపింది. అలాగే మంగళవారం ఏపీలోని పలు ప్రాంతాల్లో మేఘావృతమైన వాతావరణం నెలకొంది. నెల్లూరు, తిరుపతి జిల్లాల్లో పలుచోట్ల భారీ వర్షం కురిసింది. కోస్తాంధ్రలో కొన్ని చోట్ల, రాయలసీమలో ఒకటి రెండు చోట్ల తేలికపాటి నుంచి మోస్తరు వర్షాలు కురిశాయి.

ఇదిలావుంటే, బంగాళాఖాతంలో ఏర్పడిన ఉపరితల ఆవర్తనం కారణంగా రానున్న రెండు రోజుల పాటు తెలంగాణలోని పలుచోట్ల తేలికపాటి నుంచి మోస్తరు వర్షాలు కురిసే అవకాశం ఉందని వాతావరణ శాఖ అధికారులు తెలిపారు. 

ఈశాన్యం నుంచి తెలంగాణ వైపు వీస్తున్న గాలుల ప్రభావంతో గ్రేటర్ హైదరాబాద్‌లో ఉష్ణోగ్రతలు స్వల్పంగా తగ్గుముఖం పట్టాయి. గ్రేటర్‌ హైదరాబాద్‌లోని కొన్ని ప్రాంతాల్లో వర్షాలు కురుస్తాయని వాతావరణ శాఖ తెలిపింది.