'ఫెంగాల్' : దక్షిణ కోస్తా ఆంధ్రప్రదేశ్, రాయలసీమల్లో భారీ వర్షాలు

Cyclone

నైరుతి బంగాళాఖాతంలో ఏర్పడిన తుఫాను 'ఫెంగాల్' శనివారం రాత్రి 10:30 నుండి 11:30 గంటల మధ్య పుదుచ్చేరి సమీపంలో తీరం దాటినట్లు ఆంధ్రప్రదేశ్ రాష్ట్ర విపత్తు నిర్వహణ మేనేజింగ్ డైరెక్టర్ రోణంకి కూర్మనాథ్ తెలిపారు.

తుఫాను పశ్చిమ-నైరుతి దిశలో నెమ్మదిగా కదులుతోంది. క్రమంగా బలహీనపడుతుందని భావిస్తున్నారు. దీని ప్రభావంతో దక్షిణ కోస్తా ఆంధ్రప్రదేశ్, రాయలసీమలోని పలు ప్రాంతాల్లో ఈరోజు భారీ వర్షాలు కురిసే అవకాశం ఉందని ఆయన తెలిపారు. 

లోతట్టు ప్రాంతాల ప్రజలు అప్రమత్తంగా ఉండాలని సూచించారు. తుఫాను ప్రభావంతో తమిళనాడు, పుదుచ్చేరి, ఆంధ్రప్రదేశ్‌లోని పలు ప్రాంతాల్లో ఇప్పటికే భారీ వర్షాలు కురుస్తున్నాయి.

ఆర్ఎంసీ డైరెక్టర్, బాలచంద్రన్ మాట్లాడుతూ... "ప్రస్తుతం, ఫెంగల్ తుఫాను పశ్చిమ-నైరుతి దిశగా 7 కి.మీ/గం వేగంతో కదులుతోంది. తీవ్ర అల్పపీడనంగా బలహీనపడుతుందని భావిస్తున్నారు. తుఫాను పుదుచ్చేరి సమీపంలో మూడు గంటల పాటు స్థిరంగా ఉంది. ఫలితంగా నిరంతర భారీ వర్షాలు కురుస్తున్నాయి.

 గత 24 గంటల్లో ఆరు చోట్ల భారీ వర్షపాతం నమోదు కాగా, మూడు చోట్ల అతి భారీ వర్షపాతం నమోదైంది. గతంలో జారీ చేసిన వాతావరణ హెచ్చరికలు అమలులో ఉన్నాయి. చెన్నై- కారైకాల్‌లోని డాప్లర్ వెదర్ రాడార్‌లను ఉపయోగించి వ్యవస్థను నిశితంగా పరిశీలిస్తున్నారు. 

విల్లుపురంలోని మైలం ఆల్-వెదర్ స్టేషన్‌లో నవంబర్ 30 ఉదయం 8.30 నుండి డిసెంబర్ 1వ తేదీ ఉదయం 5:30 గంటల మధ్య 498 మిల్లీమీటర్ల వర్షపాతం నమోదైంది. ఇదే సమయంలో పుదుచ్చేరిలో 469.5 మి.మీ వర్షపాతం నమోదైంది.

వాతావరణ శాఖ డేటా ప్రకారం, నవంబర్ 30, శనివారం తీరాన్ని తాకిన తుఫాను కేవలం 21 గంటల్లోనే విల్లుపురంలో 50 సెంటీమీటర్ల భారీ వర్షాన్ని కురిపించింది. ఇతర జిల్లాల్లోనూ భారీ వర్షపాతం నమోదైంది.