తెలుగు రాష్ట్రాల్లో నందమూరి హీరోలు అంటే వల్లమాలిన అభిమానం ఉన్న ఫ్యాన్స్ అనేక మంది ఉన్నారు. వీరిలో కొందరు డైహార్డ్ ఫ్యాన్స్ ఉంటే, మరికొందరు మరోరకమైన అభిమానులు ఉన్నారు. ఇలాంటి వారిలో ఒకడు పెద్దినాయుడు. గత 2019 నుంచి పెళ్ళి చేసుకోవాలని భావిస్తున్నాడు. అయితే, పెళ్లికి అతిథిగా నందమూరి హీరో బాలకృష్ణ రావాలన్నది ఆయన కోరిక. ముహూర్త సమయానికి బాలకృష్ణ రాలేకపోతుండటంతో పెద్దినాయుడు పెళ్లి గత మూడేళ్ళుగా వాయిదాపడుతూ వస్తుంది.
బాలయ్యను అమితంగా ప్రేమించే పెద్దినాయుడు అనే వీరాభిమాని సొంతూరు విశాఖపట్టణం. ఆయనకు గౌతమీ ప్రియ అనే అమ్మాయితో గత 2019లో నిశ్చితార్థం జరిగింది. గౌతమి కూడా బాలకృష్ణ అభిమాని కావడంతో వారిద్దరూ తమ అభిమాన హీరో బాలకృష్ణ సమక్షంలో దంపతులుగా మారాలన్న పట్టుదలతో ఉన్నారు. దీంతో తమ వెడ్డింగ్ కార్డును గత 2019లో వైజాగ్ ఫ్యాన్స్ అసోసియేషన్ ద్వారా బాలకృష్ణకు పంపించారు.
అయితే, వివిధ రకాలైన కార్యక్రమాలతో బిజీగా ఉన్నందున రాలేకపోతున్నట్టు సమాచారం అందించారు. దీంతో పెద్దినాయుడు - గౌతమి కూడా తమ వివాహాన్ని వాయిదా వేసుకున్నారు. తాజాగా ఆయన పెళ్లికి మరో ముహూర్తం కుదుర్చుకున్నారు. ఈ సారైనా బాలయ్య వస్తారని, ఆయనకు ఘన స్వాగతం పలికేందుకు ఊరంతా సిద్ధమవుతున్నారట. మరి బాలకృష్ణ ఈ సారైనా వస్తారో లేదో వేచి చూడాలి.