పోసాని రియలైజ్ అయ్యేందుకు ప్రభుత్వం ఓ ఛాన్స్ ఇవ్వాలి : నటుడు శివాజీ (Video)

టీడీపీ అధినేత నారా చంద్రబాబు నాయుడు, ఆయన తనయుడు నారా లోకేశ్, జనసేన పార్టీ అధినేత పవన్ కళ్యాణ్, వారి కుటుంబ సభ్యులను అసభ్యంగా దూషించిన కేసులో అరెస్ట అయి విచారణ ఖైదీగా జైలులో ఉన్న సినీ నటుడు, రచయిత పోసాని కృష్ణమురళి చేసిన తప్పును తెలుసుకుని రియలైజ్ అయ్యేందుకు ఏపీ ప్రభుత్వం ఒక అవకాశం ఇవ్వాలని సినీ నటుడు శివాజీ విజ్ఞప్తి చేశారు. 

తాను నటించిన ఓ సినిమా కార్యక్రమంలో ఆయన పాల్గొని ప్రసంగించారు. రాజకీయ నాయకుల వ్యక్తిగత జీవితాల వరకు ఎవరూ వెళ్లరాదన్నారు. ఒక వేళ పార్టీ అధిష్టానం ఆదేశాల మేరకు ఒక వ్యక్తిని లక్ష్యంగా చేసుకుని విమర్శించే క్రమంలో ఎట్టిపరిస్థితుల్లోనూ ఆయా వ్యక్తుల కుటుంబం జోలికి పోరాదన్నారు. తాను 12 యేళ్ల పాటు రాజకీయ జీవితంలో ఉన్నానని, ఏనాడూ కూడా ఏ ఒక్కరిని వ్యక్తిగతంగా విమర్శించలేదని ఆయన గుర్తు చేశారు. 

అదే సరైన పద్దతి అని కూడా శివాజీ తెలిపారు. అలాంటపుడు మనం కూడా సేఫ్ ఉంటామని చెప్పారు. ఇక పోసాని విషయంలో జరిగింది చాలని, ఆయన రియలైజ్ అవ్వడానికి ఒక అవకాశం ఇవ్వాలని ప్రభుత్వాన్ని కోరారు. కాగా, పోసానికి కోర్టు ఈ నెల 26వ తేదీ వరకు రిమాండ్ విధించిన విషయం తెల్సిందే.