ఏపీలోని కడప జిల్లా వాల్మీకిపురంలోని గురుకుల పాఠశాలలో దారుణం జరిగింది. ఈ స్కూల్‌లో తొమ్మిదో తరగతి చదువుతున్న 14 యేళ్ల బాలిక ప్రసవించింది. ఈ ఘటన స్థానికంగా కలకలం సృష్టించింది. శనివారం సాయంత్రం బాలికకు తీవ్రమైన కడుపునొప్పి వచ్చింది. దీంతో ఆ బాలికను పాఠశాల సిబ్బంది సమీపంలోని ఆస్పత్రికి తరలించారు. అక్కడ బాలికను పరీక్షించిన వైద్యులు.. గర్భవతిగా తేల్చారు. ఆ తర్వాత కొన్ని నిమిషాల వ్యవధిలో ఆ బాలిక మగబిడ్డకు జన్మనిచ్చింది.
ఈ విషయం తెలుసుకున్న స్థానిక తాహశీల్దారు ఫిరోజ్ ఖాన్, ఎస్ఐ బిందుమాధవిలు హుటాహుటిన ఆస్పత్రికి చేరుకుని వైద్యులతో మాట్లాడి మెరుగైన వైద్యం కోసం తిరుపతి ఆస్పత్రికి తరలించారు. ఈ ఘటనపై జిల్లా కలెక్టర్ తీవ్ర ఆగ్రహం వ్యక్తం చేస్తూ విచారణకు ఆదేశించారు. మరోవైపు ఆ బాలిక గర్భందాల్చడానికి బాలిక మేనమామే కారణమనే అనుమానాలు వ్యక్తమవుతున్నాయి.