నేటితో ముగియనున్న వైఎస్ షర్మిల ఇంటి వివాహ వేడుక.. డుమ్మాకొట్టిన అన్న జగన్!!

ఏపీ కాంగ్రెస్ పార్టీ అధ్యక్షురాలు వైఎస్ షర్మిల - అనిల్ కుమార్ దంపతుల కుమారుడు వైఎస్ రాజారెడ్డి వివాహ వేడుక ఆదివారంతో ముగియనున్నాయి. బంధువులు, సన్నిహితుల సమక్షంలో శనివారం సాయంత్రం ఈ పెళ్లి వేడుక జరగింది. హాల్దీ వేడుక ఫోటోలను సోషల్ మీడియాలో షర్మిల తన ట్విట్టర్ ఖాతాలో షేర్ చేశారు. కాగా, ఈ పెళ్లి వేడుకకు హాజరుకావాలని తన అన్న, ఏపీ ముఖ్యమంత్రి, వైకాపా అధినేత జగన్మోహన్ రెడ్డికి వివాహ ఆహ్వాన పత్రికను షర్మిల స్వయంగా అందజేశారు. కానీ నిశ్చితార్థ కార్యక్రమానికి హాజరయ్యారే కానీ, పెళ్లికి మాత్రం డుమ్మా కొట్టారు. ఈ వివాహ వేడుక రాజస్థాన్ రాష్ట్రంలోని జైపూర్ ప్యాలెస్‌లో అంగరంగ వైభవంగా జరిగింది. నూతన దంపతులు వైఎస్ రాజారెడ్డి, ప్రియా వివాహ ఘట్టానికి షర్మిల దంపతులతో పాటు షర్మిల తల్లి విజయమ్మ, కూతురు అంజలి, వధువు అట్లూరి ప్రియ తల్లిదండ్రులు, కుటుంబ సభ్యులుతో పాటు అతి కొద్దిమంది స్నేహితులు, కుటుంబ సభ్యులు మాత్రమే ఉన్నారు. 

అయితే, ఈ వివాహ వేడుకకు అన్న, ఏపీ సీఎం జగన్మోహన్ రెడ్డి, ఆయన సతీమణి భారతీ రెడ్డిలు హాజరుకాలేదు. దీనిపై అధికారిక ప్రకటన లేకపోయినప్పటికీ అనివార్య కారణాల వల్ల హాజరుకాలేదని మీడియాలో వార్తలు వస్తున్నాయి. వధూవరులు ఇక్కడికి వచ్చాక ప్రత్యేకంగా వెళ్లి ఆశీర్వదించనున్నట్టు సమాచారం. కాగా, ఈ నెల 16వ తేదీన ప్రారంభమైన మూడు రోజుల పెళ్లి వేడుక ఆదివారంతో ముగిసింది. ఇందులో సంగీత్, మెహందీ, పెళ్లి వంటి కార్యక్రమాలు బంధువులు, సన్నిహితుల సమక్షంలో సందడి సందడిగా జరిగాయి. ఆదివారం తలంబ్రాలు, విందు కార్యక్రమాలు జరుగనున్నాయి.