ఏపీ మాజీ సీఎం చంద్రబాబును కొనియాడిన రోజా.. వీడియో వైరల్

నగరి ఎమ్మెల్యే, వైకాపా ఫైర్ బ్రాండ్ రోజా గురించి ప్రత్యేకంగా చెప్పనక్కర్లేదు. వైకాపా తరపున ప్రజా సేవలో యాక్టివ్‌గా వుండే రోజా, ప్రస్తుతం అనారోగ్యం కారణంగా ఇంటికే పరిమితమయ్యారు. అయితే వీడియో ద్వారా తాను ఆరోగ్యంగానే వున్నానని క్లారిటీ ఇచ్చారు.

తెలుగుదేశం పార్టీ జాతీయ అధ్యక్షుడు, మాజీ ముఖ్యమంత్రి చంద్రబాబు నాయుడు జన్మదినం సందర్భంగా కొన్నేళ్ల క్రితం నాటి టీడీపీ నాయకురాలు.. నేటి వైసీపీ ఎమ్మెల్యే రోజా మాట్లాడిన వీడియో ఒకటి వైరల్ అవుతోంది. టీడీపీ నాయకురాలిగా చంద్రబాబును ఆకాశానికెత్తుతూ ఆమె మాట్లాడారు. శూరుడు.. ధీరుడు అంటూ చంద్రబాబును ఉద్దేశించి వ్యాఖ్యానించారు.

''తెలుగుతల్లి అన్నపూర్ణ వరాలపట్టి.. అమ్మణ్ణమ్మ కలల పంట.. నందమూరి సింహ రాజకీయ వారసుడు, స్వర్ణాంధ్రప్రదేశ్ సృష్టికర్త, తెలుగు ఆడపడుచుల ఆత్మీయ సోదరుడు, తెలుగు సింహం, అపర రాజకీయ మేధాదురంధురుడు, పేదల పాలిట పెన్నిధి, తెలుగువారి ఆత్మాభిమానాన్ని ప్రపంచ నలుదిశలా వ్యాపింపజేసిన కీర్తి వెలుగుల చంద్రుడు.. జగమంతా మెచ్చిన ఆంధ్రుడు, తెలుగు సామ్రాజ్య వీర.. ధీర.. శూర రాజకీయ చక్రవర్తి.. తెలుగుదేశం పార్టీ రాష్ట్ర అధ్యక్షుడు మన ప్రియతమ నాయకుడు మాన్యశ్రీ నారా చంద్రబాబు నాయుడు గారు'' అంటూ రోజా కీర్తించారు.