సామాన్యుడికి చుక్కలు చూపిస్తున్న టమోటా ధరలు

సామాన్యుడికి టమోటా ధరలు చుక్కలు చూపిస్తున్నాయి. టమోటా ధరలు పెట్రోల్ ధరలను దాటేశాయి. పెరుగుతున్న ధరల కారణంగా టమోటాలను కొనడం మానేశారు. ఏపీలో కిలో టమాటా గరిష్ఠంగా రూ.130 పలికింది. బుధవారం నుంచి సగటున కిలో టమాటా రూ.104కు అమ్ముడవుతోంది. టిఫిన్ సెంటర్ల నిర్వాహకులు టమాట చట్నీకి రాంరాం చెప్పారు.

పావు కిలో టమాటలను కొనేబదులు.. అదే రేటుకు రెండు మూడు రకాల ఆకు కూరలు కొంటున్నారని వ్యాపారులు అంటున్నారు. వాస్తవానికి రెండు నెలల క్రితం వరకు కిలో టమాటా రూ.10 ఉండగా.. ఇప్పుడు ఏకంగా 10 రెట్లు పెరిగి సామాన్యుడికి అందనంత ఎత్తులో ఉంది. 

భారీ వర్షాలు పడడం, ట్రాన్స్ పోర్ట్ కు ఆటంకాలు ఏర్పడడం వంటి కారణాలతో టమాటాల రాక తగ్గిపోయింది. ఫలితంగా ధరలకు రెక్కలొచ్చాయి. ఇటు వేరే కూరగాయల ధరలూ బాగా పెరిగాయి.

మదనపల్లి, అనంతపురం జిల్లాల్లో ఎడతెరిపి లేకుండా కురుస్తున్న వర్షాల కారణంగా టమాటా పంట దెబ్బతినడంతో కర్నూలు జిల్లాలో టమోటాలకు డిమాండ్‌ పెరిగిందని ఉద్యానవనశాఖ అసిస్టెంట్‌ డైరెక్టర్‌ (ఏడీహెచ్‌) బీవీ రమణ తెలిపారు. 

రైతులు పండించిన పంటలకు ఇంత ఎక్కువ ధర లభించడం ఇదే తొలిసారి. అయితే టమోటా రైతులు పండించిన పంటకు నమ్మశక్యం కాని ధర లభించడం పట్ల రైతులు చాలా సంతోషంగా ఉన్నారని సమాచారం.

కర్నూలులో పత్తికొండ, మద్దికెర, పీపల్లీ‌, ఆస్పరి, ఆలూరు, దేవనకొండ, ధోనే, కోడుమూరు మండలాల్లో టమాట సాగు చేస్తున్నారు. ఈ మండలాల్లో 15,000 నుంచి 16,000 హెక్టార్లలో పంట సాగైంది. 

మూడు నెలల క్రితం కనీసం కనీస మద్దతు ధర లభించక రైతులు తీవ్రంగా నష్టపోయారు. గతంలో గిట్టుబాటు ధర లేక పలు సందర్భాల్లో రైతులు టమోటాలను రోడ్లపై పారబోశారు.