బోనాల జాతర : ఎస్ఐ బుగ్గపై గబుక్కున ముద్దుపెట్టిన అకతాయి

హైదరాబాద్ మహానగరంలో అంగరంగవైభవంగా బోనాల జాతర జరుగుతోంది. ఈ జాతరలో కొంతమంది పోకిరీలు పాడుపనులకు పాల్పడుతున్నారు. ముఖ్యంగా, పీకలవరకు మద్యం సేవించి వెధపనులకు పాల్పడుతున్నారు. తాజాగా ఓ అకతాయి పీకల వరకు మద్యం సేవించి వెకిలి చేష్టలకు పాల్పడుతున్నారు. బోనాల జాతరలో ఓ ఆకతాయి చేసిన పనికి ఎస్.ఐ షాక్ తిన్నాడు. ఆ అకతాయి ఆ ఎస్ఐకే ముద్దుపెడుతూ అడ్డంగా చిక్కిపోయాడు. 

తాజాగా వెలుగులోకి వచ్చిన ఈ వివరాలను పరిశీలిస్తే, హైదరాబాద్ వెస్ట్ జోన్ పోలీస్ స్టేషన్ పరిధిలోని పోలీసులు బోనాల జాతరకు బందోబస్తుగా ఉన్నారు. వీరిలో పలువురు ఎస్.ఐలు కూడా ఉన్నారు. అయితే, ఓ అకతాయి ఫుల్లుగా మద్యం సేవించి బోనాలు జరిగే ప్రాంతానికి వచ్చాడు. ఆ సమయంలో అటువైపుగా వెళుతున్న ఓ ఎస్ఐను హగ్ చేసుకుని గబుక్కున బుగ్గపై ముద్దుపెట్టాడు. దీంతో ఆ ఎస్ఐతో సహా అక్కడున్నవారంతా నోరెళ్లబెట్టారు. 

ఆ అకతాయి ఉన్నట్టుండి ఎస్ఐకు ముద్దుపెట్టిన తర్వాత.. అసలేమీ జరగనట్టుగా డ్యాన్సుల్లో నిమగ్నమైపోయాడు. యువకుడి చర్యతో కోపోద్రిక్తుడైన ఎస్ఐ.. అతన్ని మందలించేందుకు ముందుకు ఉపక్రమించాడు. దీంతో భయపడిన ఆ అకతాయి కాస్త వెనక్కి తగ్గాడు. ఆపై ఎస్ఐ అక్కడినుంచి వెళ్లిపోవడంతో యధావిధిగా డ్యాన్స్‌లో లీనమయ్యాడు. దీనికి సంబంధించిన వీడియో ఒకటి ఇపుడు సోషల్ మీడియాలో వైరల్ అయింది. 

ఫలితంగా ఈ విషయం హైదరాబాద్ పోలీసు ఉన్నతాధికారుల దృష్టికి వెళ్లింది. దీంతో నల్లకుంట పోలీస్ స్టేషన్ ఇన్‌స్పెక్టర్ కె.మురళీధర్ స్పందించారు. అకతాయిపై ఐపీసీ 353 సెక్షన్ కింద కేసు (పబ్లిక్ సర్వెంటే విధులకు ఆటంకం కలిగించడం) నమోదు చేసినట్టు తెలిపారు. ఈ 28 యేళ్లున్న ఈ అకతాయి ఓ బ్యాంకులో పని చేస్తున్నాడనీ, అతన్ని కస్టడీలోకి తీసుకుని విచారించనున్నట్టు తెలిపారు.