ఓడలు బళ్లవుతాయి... బళ్లు ఓడలవుతాయి అని మన పెద్దలు చెప్పే సామెత తెలిసిందే. రాజకీయాల్లో ఇది మరీ ఎక్కువ. ఐదేళ్ల క్రితం దర్పంతో వుండే ముఖ్యమంత్రులు తదుపరి ఎన్నికల్లో ఏమీ లేకుండా అయిపోతారు. ఇప్పుడు చంద్రబాబు నాయుడు పరిస్థితి అలాగే తయారైంది. ఇప్పటికే పార్టీలో ఓడిన నాయకులు పక్కచూపులు చూస్తున్నారు. మరికొందరేమో... పార్టీ బాధ్యతలు అప్పజెపుతుంటే... మాకొద్దు అంటూ ముఖం మీదే చెప్పేస్తున్నారు. ఇదీ అధికారం పోయిన తర్వాత పరిస్థితి.
ఇక అసలు విషయానికి వస్తే... మాజీ ముఖ్యమంత్రి చంద్రబాబు నాయుడు ఏపీ సీఎం జగన్ మోహన్ రెడ్డిని తొలిసారిగా ఓ అభ్యర్థన చేశారు. అదేమిటంటే.. తను ప్రస్తుతం వుంటున్న నివాసం పక్కనే వున్న ప్రజావేదికను తన అధికారిక కార్యకలాపాల కోసం కేటాయించాలన్నది. ఎన్నికలకు ముందు తను ఏ గృహంలో అయితే వుంటున్నానో అదే ఇంట్లో తను వుండాలని నిర్ణయించుకున్నాననీ, దాని ప్రక్కనే వున్న ప్రజావేదిక ఖాళీగా వుండటంతో దాన్ని తన అధికారిక కార్యకలాపాలను జరుపుకునేందుకు ఇవ్వాలంటూ అభ్యర్థించారు. మాజీ సీఎం అభ్యర్థనకు సీఎం జగన్ మోహన్ రెడ్డి సానుకూలంగా స్పందిస్తారని అనుకుంటున్నారు. ఏం చేస్తారో చూడాలి.