ఆత్మకూరు ఉప ఎన్నిక : 80 వేలకు పైగా మెజార్టీతో విక్రమ్ రెడ్డి గెలుపు

నెల్లూరు జిల్లా ఆత్మకూరు అసెంబ్లీ నియోకవర్గానికి జరిగిన ఉప ఎన్నికల పోలింగ్ పోలింగ్ ఓట్ల లెక్కింపు ఆదివారం చేపట్టారు. ఓట్ల లెక్కింపు పూర్తయ్యే సమయానికి వైకాపా అభ్యర్థి మేకపాటి విక్రమ్ రెడ్డి 82,888 ఓట్ల మెజార్టీతో గెలుపొందారు. ఈ ఎన్నికల్లో ప్రతిపక్ష తెలుగుదేశం పార్టీ పోటీ చేయలేదు. అలాగే, పవన్ కళ్యాణ్ సారథ్యంలోని జనసేన పార్టీ కూడా పోటీకి దూరంగా ఉంది.

మంత్రి మేకపాటి గౌతంరెడ్డి హఠాన్మరణంతో ఈ నియోజకవర్గానికి ఉప ఎన్నిక పోలింగ్ నిర్వహించాల్సిన పరిస్థితి ఏర్పడింది. ఇక్కడ వైకాపా తరపున మేకపాటి విక్రమ్ రెడ్డిని వైకాపా బరిలోకి నిలిపింది. ఈ నెల 23వ తేదీన పోలింగ్ జరుగగా, ఆదివారం ఓట్ల లెక్కింపు చేపట్టారు. మొత్తం 20 రౌండ్లపాటు జరిగిన ఓట్ల లెక్కింపులో విక్రమ్ రెడ్డి 82 వేలకు పైగా ఓట్ల మెజార్టీతో ఘన విజయం సాధించారు. 

ఈ గెలుపును అధికారికంగా ప్రకటించిన తర్వాత ఆయన విలేకరులతో మాట్లాడుతూ, తన అన్న మేకపాటి గౌతంరెడ్డి పేరును నిలబెట్టేందుకు కృషి చేస్తానని చెప్పారు. తమ కుటుంబంపై మరోసారి నమ్మకం ఉంచినందుకు ఆత్మకూరు నియోజకవర్గ ప్రజలకు ధన్యవాదాలు తెలుపుకుంటున్నట్టు చెప్పారు. 

ఈ ఉప ఎన్నిక పోలింగ్ చాలా పారదర్శకంగా జరిగిందన్నారు. పైగా, తన విజయానికి ముఖ్యమంత్రి జగన్మోహన్ రెడ్డి అమలు చేస్తున్న సంక్షేమ పథకాలేనని చెప్పారు. ఈ ఉప ఎన్నికల తీర్పుతో సీఎం జగన్‌కు ప్రజల్లో ఏమాత్రం ఆదరణ తగ్గలేదని మరోమారు నిరూపితమైందన్నారు. రాష్ట్రంలో సంక్షేమ పథకాలు మునుపెన్నడూ లేని విధంగా అమలవుతున్నాయని చెప్పారు.