ఆంధ్రప్రదేశ్ రాష్ట్ర ఎన్నికల సంఘం కమిషనరు నిమ్మగడ్డ రమేష్ కుమార్‌ను ఆ రాష్ట్ర ప్రభుత్వ ప్రధాన కార్యదర్శి నీలం సాహ్ని ఓ ఆట ఆడుకుంటున్నారు. వచ్చే ఫిబ్రవరి నెలలో ఏపీలో పంచాయతీ ఎన్నికలు నిర్వహించేందుకు రాష్ట్ర ఎన్నికల సంఘం సిద్ధమవుతోంది. ఇదే అంశంపై అన్ని జిల్లాల కలెక్టర్లు, ఎస్పీలతో వీడియో కాన్ఫరెన్స్ సమావేశాన్ని నిమ్మగడ్డ రమేష్ కుమార్ ఏర్పాటు చేశారు. అయితే, ఈ సమావేశంలో పాల్గొనేందుకు కలెక్టర్లకు, ఎస్పీలకు ప్రభుత్వ ప్రధాన కార్యదర్శి నీల సాహ్ని అనుమతి ఇవ్వలేదు. దీంతో బుధవారం ఒకసారి, గురువారం మరోమారు ఈ సమావేశం వాయిదాపడింది.
అన్ని జిల్లాల కలెక్టర్లు, ఎస్పీలతో మాట్లాడిన తర్వాత స్థానిక సంస్థల ఎన్నికలపై ఎస్ఈసీ నిమ్మగడ్డ రమేష్ కుమార్ ఓ కీలక ప్రకటన చేయాలని భావిస్తున్నారు. ఇందుకోసమే ఆయన వీడియో కాన్ఫరెన్స్ నిర్వహించేందుకు ప్లాన్ చేశారు. ఈ మేరకు అన్ని జిల్లాల కలెక్టర్లు, జడ్పీ సీఈవోలు, జిల్లా పంచాయతీ అధికారులకు నిమ్మగడ్డ ఓ లేఖ రాయగా, వారు సమావేశంలో పాల్గొనలేదు.
ఈ సమావేశంలో పాల్గొనేందుకు ఏపీ సీఎస్‌ను ఇప్పటికే అనుమతి కోరినట్లు ఎస్ఈసీ చెప్పారు. అయినప్పటికీ, సీఎస్ నుంచి అధికారులకు అనుమతి రాకపోవడం గమనార్హం. దీంతో ఆ వీడియో కాన్ఫరెన్స్ రద్దయింది. దీంతో సీఎస్ నీలం సాహ్నికి నిమ్మగడ్డ రమేశ్‌ కుమార్ మరోసారి లేఖ రాశారు. కలెక్టర్లు, జడ్పీ సీఈవోలు, జిల్లా పంచాయతీ అధికారులతో వీడియో కాన్ఫరెన్స్ ఏర్పాటు చేయాలని అందులో కోరినట్లు తెలిసింది.
నిజానికి ఈ ఎన్నికల నిర్వహణకు సంబంధించిన సీఎస్ నీలం సాహ్నికి నిమ్మగడ్డ ఓ లేఖ రాశారు. అయితే, అధికారులంతా కోవిడ్ విధుల్లో ఉన్నారని, ఈ నేపథ్యంలో ఎన్నికల నిర్వహణపై వీడియో కాన్ఫరెన్స్ నిర్వహించాల్సిన అవసరం లేదని బదులిస్తూ ఎస్ఈసీకి ఆమె లేఖ రాశారు.
ఈ క్రమంలో ఆయన మరోసారి లేఖ రాసినా ప్రభుత్వం వైపు నుంచి స్పందన రాలేదు. దీంతో, దీంతో చిర్రెత్తుకొచ్చిన నిమ్మగడ్డ ఏపీ ప్రభుత్వ సీఎస్ వైఖరిపై కోర్టును ఆశ్రయించాలన్న యోచనలో ఉన్నట్టు తెలుస్తోంది.
మరోవైపు, ఈ సమావేశంలో పాల్గొనాలని సీఎస్ నుంచి తమకు ఎలాంటి ఆదేశాలు రాలేదని జిల్లాల కలెక్టర్లు చెబుతున్నారు. వీడియో కాన్ఫరెన్స్‌లో పాల్గొనేందుకు అధికారులకు అనుమతి ఇవ్వకపోవడాన్ని న్యాయస్థానం దృష్టికి తీసుకువెళ్లాలని ఎస్ఈసీ భావిస్తున్నట్లు తెలిసింది.