ఆంధ్రప్రదేశ్ రాష్ట్రంలో వచ్చే యేడాది ఆరంభంలో పార్లమెంట్ ఎన్నికలతో పాటు అసెంబ్లీ ఎన్నికలు కూడా జరుగనున్నాయి. దీంతో ఎన్నికల సమయానికి ఏపీ ప్రభుత్వం అన్నీ చక్కబెట్టుకుంటుంది. ముఖ్యంగా, తమకు అనుకూలంగా ఉండే వారికి కీలకమైన పోస్టింగులు ఇస్తుంది. అలాగే, పోలీస్‌లను కూడా బదిలీ చేస్తుంది.
ఈ నేపథ్యంలో తాజాగా కొందరు ఐపీఎస్ అధికారులతో పాటు డీఎస్పీలను బదిలీ చేసింది. ఈ మేరకు డీజీపీ రాజేంద్రనాథ్ రెడ్డి ఉత్తర్వులు జారీచేశారు. ఏకంగా 55 పోలీస్ సబ్ డివిజన్ల స్థానాల్లో ఈ బదిలీలు చేసింది. ఈ మేరకు బుధవారం అర్థరాత్రి 12.48 గంటల సమయంలో ఉత్తర్వులు జారీ చేసింది.
బదిలీ అయిన వారిలో ఏడుగురు ఐపీఎస్ అధికారులు కూడా ఉన్నారు. 70 మంది డీఎస్పీలతో పాటు మొత్తం 55 పోలీస్ సబ్ డివిజన్లకు ప్రస్తుతం పనిచేస్తున్న వారిని బదిలీ చేసి ఆ స్థానాల్లో వేరే వారిని సబ్ డివిజనల్ పోలీస్ అధికారులుగా, ఏసీపీ, ఎస్పీలుగా నియమించారు.