మీల్‌మేకర్ మంచూరియా ఎలా చేయాలి?

మీల్ మేకర్‌లోని హై ప్రోటీన్స్ మహిళల, పిల్లల ఆరోగ్యానికి ఎంతో మేలు చేస్తాయని న్యూట్రీషన్లు అంటున్నారు. కొలెస్ట్రాల్‌ను కంట్రోల్ చేసే ఈ మీల్ మేకర్‌లో బి- విటమిన్స్, ఒమెగా 3 ఫ్యాటీ యాసిడ్స్, క్యాల్షియం, ఐరన్ పుష్కలంగా ఉన్నాయని వారు చెబుతున్నారు. అలాంటి మీల్ మేకర్‌తో మంచూరియా ట్రై చేస్తే ఎలా ఉంటుందో చూద్దామా?

కావలసిన పదార్థాలు: మీల్‌మేకర్ - 200 గ్రాములు, కొత్తిమీర - 3 కట్టలు, సోయాసాస్ - 6 స్పూన్లు, ఉల్లి కాడలు - 100 గ్రా, వెనిగర్ - 4 స్పూన్లు, అజినమోటా - 2 స్పూన్లు, కార్న్‌ఫ్లోర్ పౌడర్ - 2 స్పూన్లు, అల్లం, వెల్లుల్లి - 100గ్రా, పచ్చిమిరపకాయలు - పది, నూనె - సరిపడేంత, ఉప్పు - సరిపడేంత.

తయారీ విధానం: ముందుగా ఒక గిన్నెలో మీల్‌మేకర్స్‌ను నీటిలో నాన్చి దాన్ని పది నిమిషాల పాటు స్టౌమీద ఉడికించాలి. ఆ తర్వాత గిన్నెలోని నీటిని తొలగించి మీల్‌మేకర్స్‌ను దోరగా నూనెలో వేయించుకుని పక్కన బెట్టుకోవాలి. మరో బాణలిలో నూనె పోసి కాగాక, పచ్చిమిరపకాయలు సన్నని ముక్కలుగా తరుగుకొని వాటితో పాటు అల్లం, వెల్లుల్లి పేస్ట్‌ను కలుపుకోవాలి. 

సన్నని మంటపై ఉంచి బాగా వేగాక, రెండు గ్లాసుల నీరు పోసి సోయాసాస్, వెనిగర్, అజినమోటా, ఉప్పు కలుపుకోవాలి. కాసేపయ్యాక కార్న్‌ఫ్లోర్‌ను నీటితో కలిపి అందులో వేయాలి. నీరు ఇంకే వరకు గరిటెతో కలియబెడుతూ ఉండాలి. అలా నీరు ఇంకిన తర్వాత సన్నగా తరిగిన ఉల్లికాడలు, కొత్తిమీర వేసి పొడిగా వేయించి మంచూరియా తయారు చేసుకోవాలి.

 దీంతో వేడి వేడి మీల్‌మేకర్ మంచూరియా రెడీ.