తిరుపతిలోని పోలీస్ డ్యూటీ మీట్‌లో సెంటర్ ఫర్ అట్రాక్షన్‌గా నిలిచిన తండ్రీకూతురును అభినందించారు రాష్ట్ర డిజిపి గౌతమ్ సవాంగ్. వెల్ డన్ ఫాదర్.. శభాష్ డాటర్ అంటూ ప్రశంసించారు. సిఐగా ఉన్న శ్యామ్ సుందర్, డిఎస్పీగా ఉన్న జెస్సి ప్రశాంతిలకు డిజిపి సెల్యూట్ చేశారు.
అసలెందుకు డిజిపి సెల్యూట్ చేశారంటే.. తండ్రి సిఐ.. కూతురు డిఎస్పీ. తన కన్నా పెద్ద స్థాయిలో ఉండటంతో తండ్రి తిరుపతిలో జరుగుతున్న పోలీస్ మీట్‌లో కుమార్తెకు సెల్యూట్ చేశాడు. ఈ ఫోటో కాస్త వైరల్‌గా మారింది. దీంతో సినీ ప్రముఖులు కూడా ఈ ఫోటోను టాగ్ చేసి మీరు పలువురికి స్ఫూర్తి అంటూ అభినందించారు.
దీంతో డిజిపి స్వయంగా ఈరోజు మధ్యాహ్నం తండ్రీకూతురును పిలిచి మాట్లాడారు. వారికి సెల్యూట్ చేశారు. దీంతో డిజిపి దృష్టికి కొన్ని విషయాలను తీసుకెళ్ళింది డిఎస్పీ ప్రశాంతి. తను పోలీసు కావాలన్న ఆశను తన తండ్రి నెరవేర్చారని చెప్పారు. ఈ సందర్భంగా డిజిపి స్వయంగా ఇద్దరినీ సన్మానించారు. వేదికపై శ్యాంసుందర్ మాట్లాడుతూ తన కుమార్తె ఉన్నతాధికారిగా బాధ్యతలు నిర్వర్తించడం సంతోషంగా ఉందని.. పోలీస్ డ్యూటీ మీట్‌లో సన్మానం చేయడం మరింత సంతోషంగా ఉందన్నారు.