ప్రముఖ సినీ రచయిత విజయేంద్ర ప్రసాద్ మరో సంచలన సినిమాను సిద్ధం చేసే పనిలో వున్నారు. తమిళనాట అమ్మగా పేరు తెచ్చుకున్న పురట్చితలైవి జయలలిత జీవిత చరిత్ర ఆధారంగా దర్శకుడు ఎల్ విజయ్ సినిమాను తెరకెక్కించబోతున్నారు. ఇందులో కంగనా రనౌత్ లీడ్ రోల్ చేస్తోంది. విజయేంద్ర ప్రసాద్ కథను సిద్ధం చేసే పనిలో వున్నాడు.
జయలలిత సాధారణ స్థాయి నుంచి అసాధారణ మహిళగా ఎలా ఎదిగిందనే కోణంలో కథను విజయేంద్ర ప్రసాద్ రెడీ చేస్తున్నారు. త్వరలోనే ఈ సినిమా సెట్స్ మీదకు వెళ్లనుంది. ఈ సినిమాను ''తలైవి'' అనే పేరు ఖరారు చేశారు. అంతేకాదు దానికి సంబంధించిన ఫస్ట్ లుక్‌ను రిలీజ్ చేశారు. మణికర్ణిక వంటి హిస్టారికల్ మూవీ తర్వాత కంగనా రనౌత్ నటిస్తోన్న బయోపిక్ ఇదే కావడం గమనార్హం.
ఇక ఈ సినిమాకు విజయేంద్ర ప్రసాద్ స్క్రిప్ట్ స్పెషల్ అట్రాక్షన్‌గా నిలుస్తుందని సినీ జనం అనుకుంటున్నారు. కాగా బాహుబలి, భజరంగి భాయ్ జాన్ సినిమాలు ఎలాంటి సంచలనాలు సృష్టించాయో ప్రత్యేకంగా చెప్పాల్సిన అవసరం లేదు.
ఈ రెండు సినిమాల ద్వారా రైటర్ విజయేంద్ర ప్రసాద్ మంచి పేరు తెచ్చుకున్నాడు. జాతీయ స్థాయిలో గుర్తింపు పొందాడు. ఈ సినిమా తరువాత బాలీవుడ్‌లో కంగనా చేసిన మణికర్ణికా సినిమాకు కథను అందించాడు. తాజాగా తలైవి కూడా ఆతనే కథను అందించడం విశేషం.