ఇలా ఇలా తేలాను... అంటున్న తలైవి.. రిలీజ్ చేసిన సమంత (Video)

Thalaivi song

బాలీవుడ్ క్వీన్ కంగనా రనౌత్ టైటిల్ పాత్రలో తెరకెక్కుతున్న సినిమా 'తలైవి'. తెలుగు, హిందీ, తమిళ భాషల్లో గత కొంతకాలంగా సినీ, రాజకీయ, క్రీడా కారుల జీవిత కథ ఆధారంగా బయోపిక్స్ తెరకెక్కుతున్న సంగతి తెలిసిందే. ఈ క్రమంలోనే జయలలిత చరిత్ర ఆధారంగా పాన్ ఇండియన్ సినిమాగా 'తలైవి' రూపొందించారు. సినీ తారగా, పార్టీ అధినేత్రిగా, ముఖ్యమంత్రిగా, ఐరన్ లేడీగా జయలలిత గురించి ఎంత చెప్పుకున్నా తక్కువే. 

జయలలిత జీవితంలో అనూహ్య సంఘటనలెన్నో ఉన్నాయి. ఆ సంఘటలను వెండితెర మీద ఆవిష్కరించబోతున్నాడు దర్శకుడు విజయ్. ఇటీవల విడుదలైన ఈ సినిమా ట్రైలర్‌కు అభిమానుల నుంచి, ప్రేక్షకుల నుంచి పాజిటివ్ రెస్పాన్స్ వచ్చిన సంగతి తెలిసిందే. కాగా 'తలైవి' సినిమాని ఏప్రిల్ 23న భారీ స్థాయిలో విడుదల చేయబోతున్నారు. 

ఈ క్రమంలో తాజాగా తలైవి సినిమా నుంచి 'ఇలా ఇలా తేలాను' అంటూ సాగే పాటను టాలీవుడ్ స్టార్ హీరోయిన్ సమంత అక్కినేని రిలీజ్ చేశారు. జీవీ ప్రకాష్ కుమార్ సంగీతం అందించిన ఈ పాటను సైందవి ప్రకాష్ పాడారు. సిరా శ్రీ సాహిత్యం అందించారు. తెలుగుతో పాటు, హిందీ, తమిళంలో రిలీజ్ అయిన ఈ పాట ప్రేక్షకులను బాగా ఆకట్టుకుంటోంది.