టాలీవుడ్ హీరోలు మరియు దర్శకులపై ఇష్టం వచ్చినట్లు వ్యాఖ్యలు చేస్తూ సునిశిత్‌ పాపులర్ అయిన సంగతి తెలిసిందే. అంతే కాదు శాక్రిఫైస్ స్టార్ గా ముద్ర పడిపోయాడు. అయితే తాజాగా మేడ్చల్ జిల్లా కీసర పోలీసులు… సునిశిత్‌ కు దిమ్మతిరిగే షాక్ ఇచ్చారు. నకిలీ వీడియో లను సృష్టించి ఓ పోలీస్ అధికారి పై తప్పుడు ఆరోపణలు చేసిన కేసులో అతడిని అరెస్టు చేశారు పోలీసులు.
తెలంగాణ రాష్ట్రంలోని జనగామ జిల్లా కు చెందిన సునిశిత్‌ ఓ కాలేజీ లో లెక్చరర్ గా పని చేశాడు. అయితే కాలేజీ లో లెక్చరర్ గా పనిచేస్తున్న సమయంలో… ఓ విద్యార్థిని పట్ల అసభ్యంగా ప్రవర్తించాడు. ఈ నేపథ్యంలోనే గతంలో జైలుకు వెళ్లాడు సునిశిత్‌.
ఆ తర్వాత విడుదలైన సునిశిత్‌… టాలీవుడ్ హీరోలపై సెటైర్లు వేస్తూ బాగా పాపులర్ అయ్యాడు. అంతేకాదు సినీ ప్రముఖులపై తప్పుడు ప్రచారం చేస్తూ ఓ కేసులో కూడా బుక్కయ్యాడు. ఇక తాజాగా మల్కాజ్గిరి పోలీస్ స్టేషన్ లో పనిచేసే ఓ పోలీస్ అధికారి పై తప్పుడు వీడియో పోస్ట్ చేశాడు సునిశిత్‌. అధికారి ఫిర్యాదుతో… కీసర పోలీసులు కేసు నమోదు చేసి దర్యాప్తు చేపట్టారు. సునిశిత్‌ ఉద్దేశపూర్వకంగానే తప్పుడు వీడియో పోస్ట్ చేసినట్లు తెలియడంతో అతడిని అరెస్టు చేసి రిమాండ్ కు తరలించారు పోలీసులు.