శ్రీకాంత్ కుమారుడు హీరోగా పెళ్లి సందడి : దర్శకుడు ఎవరంటే...?

టాలీవుడ్ హీరో శ్రీకాంత్ కుమారుడు రోషన్ కూడా వెండితెరకు పరిచయమై ఉన్నాడు. గతంలో వచ్చిన నిర్మలా కాన్వెంట్ చిత్రం ద్వారా రోషన్ హీరోగా పరిచయమయ్యాడు. అయితే, అది ఎటూ కాని వయసు కావడంతో ఆ తర్వాత గ్యాప్ తీసుకుని, నటనలో సంపూర్ణమైన శిక్షణ తీసుకున్నాడు. ఇప్పుడు పూర్తి స్థాయి హీరోగా 'పెళ్లిసందడి' చిత్రం ద్వారా ప్రేక్షకుల ముందుకు రానున్నాడు.  

పెళ్లి సందడి చిత్రం గత 1996లో వచ్చింది. శ్రీకాంత్ హీరోగా నటించగా, దర్శకేంద్రుడు కె. రాఘవేంద్ర రావు నిర్మించిన దృశ్యకావ్యం. రవణి, దీప్తి భట్నాగర్ హీరోయిన్లు. సి. అశ్వనీదత్, అల్లు అరవింద్‌లు ఈ చిత్రాన్ని సంయుక్తంగా నిర్మించారు. ఇది తెలుగునాట థియేటర్లలో ఎంతటి సందడి చేసిందో ప్రతి ఒక్కరికీ తెలిసిందే. ఈ మ్యూజికల్ లవ్ స్టోరీ బాక్సాఫీసు వద్ద సరికొత్త రికార్డులు సృష్టించింది.

ఇన్నేళ్ల తర్వాత ఇప్పుడీ చిత్రాన్ని మళ్లీ అదే పేరుతో రీమేక్ చేస్తున్నారు. ఇందులో హీరోగా నాటి 'పెళ్లిసందడి' హీరో శ్రీకాంత్ తనయుడు రోషన్ నటిస్తున్నాడు. ఈ విషయాన్ని తాజాగా చిత్ర నిర్మాణ సంస్థ సోషల్ మీడియా ద్వారా అధికారికంగా ప్రకటించింది.

ఆర్కా మీడియా వర్క్స్ సంస్థతో కలసి ప్రముఖ నిర్మాత కె.కృష్ణమోహన్ రావు నిర్మిస్తున్న ఈ చిత్రానికి రాఘవేంద్రరావు దర్శకత్వ పర్యవేక్షణ వహించనున్నారు. గౌరి రోణంకి దర్శకత్వం వహిస్తున్న ఈ చిత్రానికి ప్రముఖ సంగీత దర్శకుడు కీరవాణి మ్యూజిక్ ఇస్తున్నారు. త్వరలోనే షూటింగ్ మొదలవుతుందని చిత్ర నిర్మాతలు ప్రకటించారు.

Happy to see our Young Chalukya Veerabhadra from @Rudhramadevi and a dear friend #Roshan start his journey as a lead actor with legendary @Ragavendraraoba sir